«Ճապոնիայի Կոմիտասի անվան երաժշտական ընկերության» հոգաբարձուների խորհրդի անդրանիկ նիստը կայացավ ՀՀ դեսպանությունում
ԵՐԵՎԱՆ, 9 ՀՈՒՆԻՍԻ, ԱՐՄԵՆՊՐԵՍ: Ճապոնիայում ՀՀ դեսպանությունում հունիսի 6-ին տեղի ունեցավ «Ճապոնիայի՝ Կոմիտասի անվան երաժշտական ընկերության» հոգաբարձուների խորհրդի անդրանիկ նիստը, որի ընթացքում քննարկվեցին ընկերության նպատակները և ծրագրերը, հաստատվեց ղեկավար կազմը և կանոնադրությունը։ Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից:
Ընկերության հոգաբարձուների խորհրդի նախագահն է հայտնի դաշնակահար Տակահիրո Ակիբան, որը հայ երգահանների ստեղծագործությունների կատարումներով հաճախ է հանդես գալիս և՛ Հայաստանում, և՛ Ճապոնիայում: Պատվավոր անդամներն են Կոմիտասի անվան լարային քառյակի գեղարվեստական ղեկավար Էդուարդ Թադևոսյանը, հայ ականավոր օպերային երգչուհի, սոպրանո Արաքս Մանսուրյանը, հայ հայտնի դաշնակահար Անահիտ Ներսիսյանը։ Ընկերության պատվավոր նախագահն է Ճապոնիայում ՀՀ դեսպան Հրանտ Պողոսյանը։
Հայ հոգևոր, ժողովրդական և դասական երաժշտությունը ներկայացնելու առաքելություն իրականացնող ընկերության առաջնահերթ նպատակն է հայ մեծանուն երգահան Կոմիտասի երաժշտական ժառանգության ուսումնասիրումը, նրա ստեղծագործությունների և հայ երաժշտական արվեստի ներկայացումը ճապոնացի հանդիսատեսին: Իր գիտակրթական և կատարողական գործունեությամբ ընկերությունը նպատակաուղղված է երաժշտության ոլորտում զարգացնելու Ճապոնիայի և Հայաստանի միջև մշակութային կապերը։