Կիեւը դեմ է Ռուսաստանի նկատմամբ պատժամիջոցների վերացմանը «Մինսկ-2»-ում դրական տեղաշարժերի դեպքում
ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Ուկրաինայի արտաքին գործերի նախարար Պավել Կլիմկինը կարծում է, որ մինսկյան պայմանավորվածությունների իրականացման մեջ առաջընթացի արձանագրման դեպքում Ռուսաստանի նկատմամբ պատժամիջոցների փուլային չեղարկման առաջարկությունն «ապակառուցողական» է:
Ինչպես տեղեկացնում է «Արմենպրես»-ը՝ վկայակոչելով «Նովոստի» գործակալությունը, ավելի վաղ Գերմանիայի արտգործնախարար Ֆրանկ-Վալտեր Շթայնմայերը առաջարկել էր մտածել ՌԴ նկատմամբ պատժամիջոցների փուլային չեղարկման մասին՝ Ուկրաինայի հարցով մինսկյան պայմանավորվածությունների իրականացման առումով առաջընթացի արձանագրման դեպքում:
«Երբ պայմանավորվածությունները կատարվում են, միայն այն ժամանակ է կարելի խոսել պատժամիջոցների զրոյացման մասին»,- հայտարարել է Կլիմկինը Բեռլինում լրագրողների հետ հանդիպման ժամանակ:
Լուսանկարը` AFP