ԵՐԵՎԱՆ, 8 ՓԵՏՐՎԱՐԻ, ԱՐՄԵՆՊՐԵՍ: Սիրիական զորքերը փետրվարի 8-ին վերականգնել են հսկողությունը Կֆեյն բնակավայրի նկատմամբ, որը գտնվում Է Հալեպից հյուսիս ընկած շրջանում: Ինչպես տեղեկացնում Է «Արմենպրես»-ը՝ հղում անելով ՍԱՆԱ լրատվական գործակալությանը, սիրիական բանակի մարտիկները աշխարհազորայինների աջակցությամբ այնտեղից դուրս են մղել «Ջեբհաթ ան Նուսրա» խմբավորման զինյալներին:

Գործակալության տեղեկությունների համաձայն՝ սակրավորները ձեռնամուխ են եղել քաղաքի տների ու փողոցների ականազերծմանը, որը 23 կիլոմետր Է հեռու Թուրքիայի սահմանից:

Կֆեյնը գտնվում Է Թել Ռիֆաաթից հինգ կիլոմետր հեռավորության վրա, որտեղ պահպանվում Է «Ջեբհաթ աշ Շամիա» զինված կոալիցիայի խոշոր հենակետը: Դրա ջախջախման դեպքում զորքերը կկարողանան հսկողության տակ առնել սահմանամերձ Աազազ քաղաք տանող ավտոճանապարհը:

Ինչպես հայտնել Է «Ալ Մայադին» հեռուստակայանը, այս շրջանում մարտական գործողություններ են վարում քրդերի ջոկատները, որոնք փետրվարի 8-ին գրավել են Դեյր Ջամալ բնակավայրը, հաղորդել Է ՏԱՍՍ-ը: