ԵՐԵՎԱՆ, 6 ԴԵԿՏԵՄԲԵՐԻ, ԱՐՄԵՆՊՐԵՍ: Սահմանադրական բարեփոխումների հանրաքվեին ժամը 18:30-ի դրությամբ մասնակցել է 825 կալանավորված անձ: Այս մասին Կենտրոնական ընտրական հանձնաժողովում լրագրողների հետ հանդիպմանը հայտնեց ՀՀ արդարադատության նախարարության քրեակատարողական ծառայության կազմ-վերլուծական և միջազգային համաագործակցության բաժնի պետ, արդարադատության փոխգնդապետ Հայկ Քոչինյանը: «Ընդհանուր առմամբ քվեարկությանը մասնակցելու իրավունք ուներ 958 կալանավարված անձ, որոնցից 825-ն արդեն մասնակցել է քվեարկությանը»,- «Արմենպրես»-ի հաղորդմամբ՝ նշեց Քոչինյանը:

Նա ընդգծեց, որ կալանավորված անձանց համար քվեարկությունը կազմակերպելու համար հանրապետության քրեակատարողական հիմնարկներում ձևավորվել են տեղամասային կենտրոններ: Կալանավորված անձանց քվեարկության ընթացքում խախտումներ չեն արձանագրվել: «Նուբարաշեն» քրեակատարողական հիմնարկում քվեարկությանը հետևել են Եվրոպայի խորհրդի միջազգային դիտորդներ: