ԱՄՆ-ը կոչ է արել Բելառուսին՝ նախագահական ընտրություններն անցկացնել ըստ ԵԱՀԿ-ի ստանդարտների
ԵՐԵՎԱՆ, 24 ՕԳՈՍՏՈՍԻ, ԱՐՄԵՆՊՐԵՍ: ԱՄՆ-ը կոչ է արել Բելառուսին՝ 2015 թվականի նախագահական ընտրություններն անցկացնել Ժողովրդավարական ինստիտուտների եւ մարդու իրավունքների գծով ԵԱՀԿ-ի բյուրոյի ստանդարտներին համապատասխան: Ինչպես տեղեկացնում է «Արմենպրես»-ը, այդ կոչը տեղ է գտել ԱՄՆ-ի Պետդեպարտամենտի պաշտոնական ներկայացուցիչ Ջոն Քիրբիի հայտարարության մեջ, որը նա արել է բելառուս վեց ընդդիմադիրների ազատման կապակցությամբ:
Քիրբիի խոսքով՝ Մինսկի կողմից միջազգային ժողովրդավարական չափորոշիչների պահպանումը կնպաստի երկկողմ հարաբերությունների հետագա բարելավմանը: «Այդ քայլերը կամրապնդեն Բելառուսի ինքնիշխանությունն ու անկախությունը, ինչը Միացյալ Նահանգները միանշանակ պաշտպանում Է»,- ընդգծել է նա:
Ինչպես նշվում է հայտարարության մեջ, ԱՄՆ-ը ողջունում է բանտից Նիկոլայ Ստանկեւիչի ու եւս հինգ ընդդիմադիրների ազատումը:
«Այդ վեց քաղբանտարկյալների ազատումը դրական իրադարձություն է բելառուս ժողովրդի համար եւ կարեւոր քայլ Միացյալ Նահանգների հետ հարաբերությունների նորմալացման ճանապարհին»,- հայտարարել է Քիրբին: