ԲԵՅՐՈՒԹ, 10 ՕԳՈՍՏՈՍԻ, ԱՐՄԵՆՊՐԵՍ: Զմմառի Տիրամոր վանքի բակում օգոստոսի 9-ին տեղի է ունեցել Տանն Կիլիկիո Կաթողիկե Հայոց Գրիգոր Պետրոս Ի նորընտիր կաթողիկոս պատրիարքի գահակալության արարողությունը:

Ինչպես «Արմենպրես»-ին տեղեկացրին ՀՀ ԱԳՆ մամուլի, տեղեկատվության և հասարակայնության հետ կապերի վարչությունից, արարողությանը ներկա էին Լիբանանում ՀՀ դեսպան Աշոտ Քոչարյանը, Մեծի Տանն Կիլիկիո Արամ Ա կաթողիկոսը, Ամենայն Հայոց կաթողիկոս Գարեգին Բ-ի ներկայացուցիչ Նաթան արքիեպիսկոպոս Հովհաննիսյանը, Սուրբ Աթոռի Արևելյան եկեղեցիների ժողովի ներկայացուցիչները, Լիբանանում պապական նվիրակը, հայ և օտարազգի բարձրաստիճան հոգևորականներ, օտարերկրյա դիվանագիտական առաքելությունների ներկայացուցիչներ, նախարարներ, պատգամավորներ, բարձրաստիճան զինվորականներ, ազգային կառույցների ղեկավարներ:

Պատրիարքական գահը ընդունելուց հետո Գրիքոր Պետրոս Ի կաթողիկոս պատրիարքը մատուցել է իր առաջին պատարագը: Իր խոսքում կաթողիկոս պատրիարքը շնորհակալություն է հայտնել ՀՀ նախագահին, Ամենայն Հայոց և Մեծի Տանն Կիլիկիո կաթողիկոսներին զորակցության համար և վստահեցրել, որ ամեն ջանք կգործադրի ամրապնդելու և սերտացնելու համագործակցությունը հայրենի իշխանությունների և նվիրապետական երկու աթոռների հետ:

Պատարագին հետևել է ընթրիք, որի ժամանակ ընթերցվել են նորընտիր կաթողիկոս պատրիարքին ուղղված բազմաթիվ շնորհավորականներ: Դեսպան Քոչարյանն ընթերցել է ՀՀ նախագահ Սերժ Սարգսյանի շնորհավորական ուղերձը: