ԵՐԵՎԱՆ, 12 ՀՈՒԼԻՍԻ, ԱՐՄԵՆՊՐԵՍ: ԵՄ պետությունների ղեկավարների գագաթնաժողովը, որի ընթացքում պետք է Հունաստանի հարցով որոշում կայացվի, տեղի չի ունենա մինչեւ Եվրախմբի կողմից հարցի շուրջ վաղվա բանակցությունների ավարտը:  Ինչպես տեղեկացնում է «Արմենպրես»-ը` վկայակոչելով «Ինտերֆաքս» գործակալությունը, այս մասին կիրակի հայտարարել է Եվրախորհրդի ղեկավար Դոնալդ Տուսկը:

«Եվրոգոտու գագաթնաժողովը չի մեկնարկի, մինչեւ չավարտվեն Հունաստանի հարցով Եվրախմբի բանակցությունները»,- հայտարարել է նա:

Եվրամիության անդամ պետությունների եւ կառավարությունների ղեկավարները պլանավորում էին Բրյուսելում արտահերթ գագաթնաժողով գումարել` նվիրված հունական պարտքի խնդրին: Խոսքը պետք է գնա Հունաստանը դեֆոլտից փրկելու եւ նրան ֆինանսական աջակցության երրորդ ծրագրի մասին: Մինչեւ ԵՄ գագաթնաժողովը պետք է կայանա նաեւ եվրոգոտու 19 երկրների առաջնորդների խորհրդակցությունը:

Դիտորդները Բրյուսելում կարծում են, որ գագաթնաժողովը կարող է Հունաստանի համար վերջին շանս լինել իր բանկային համակարգի կոլապսից խուսափելու համար: