Աշոտյանը կարևորում է նոր տեխնոլոգիաների օգտագործումը կրթության ոլորտում
ԵՐԵՎԱՆ, 1 ՀՈՒԼԻՍԻ, ԱՐՄԵՆՊՐԵՍ: Ավանդական մանկավարժությանը զուգահեռ այսօրվա դարաշրջանում շատ կարևոր է օգտագործել տեխնոլոգիական նոր հնարավորությունները: Այս մասին լրագրողների հետ զրույցում նշեց ՀՀ կրթության և գիտության նախարար Արմեն Աշոտյանը:
«Մենք երկար տարիներ է, ինչ համալրում, ստեղծում, զարգացնում ենք հայալեզու կրթական բովանդակությունը: Ինտերնետով այսօր հասանելի է ինչպես դասական կրթական բովանդակությունը՝ դասագրքեր, մեթոդական ձեռնարկներ, շտեմարաններ և այլն, այնպես էլ այլընտրանքային ինտերակտիվ հայալեզու կրթական ծրագրերը»,-«Արմենպրես»-ի փոխանցմամբ՝ նշեց Արմեն Աշոտյանը:
Նախարարի խոսքով՝ այսօր աշխարհագրական պատնեշները, բյուրոկրատական խնդիրները շատ հեշտ է հաղթահարել՝ ունենալով համացանցային հնարավորություններ և հայալեզու կրթական բովանդակություն:
«Մենք ստեղծել ենք բազմաթիվ շտեմարաններ, հարյուրավոր գրքեր, մեթոդական ձեռնարկներ, որոնք հասանելի են առցանց: Չփոխարինելով ավանդական մանկավարժական, կրթական կազմակերպման մեթոդները, այլ համալրելով դրանք՝ ավելի դյուրին և հետաքրքիր է դառնում դասապրոցես կազմակերպելը»,-նշեց նա:
Արմեն Աշոտյանը շեշտեց, որ հայերեն սովորելը պետք է լինի հետաքրքիր և մոդայիկ: