ԵՐԵՎԱՆ, 5 ՄԱՅԻՍԻ, ԱՐՄԵՆՊՐԵՍ:  Ֆրանսահայ երգիչ Շառլ Ազնավուրը շուտով կնշի իր 91-րդ տարեդարձը, սակայն նա թոշակի անցնելու մտադրություն չունի: Հենց այսպես է ֆրանսիական մամուլն անդրադառնում լեգենդի նոր՝ «Encores» ձայնասկավառակին: Նոր ալբոմի վերաբերյալ հրապարակումները բազմաթիվ են: «Արմենպրես»-ի փոխանցմամբ՝ tf1.fr-ն գրում է, որ «La boheme»-ի երգիչը նոր ալբոմ է թողարկել և հանդես է գալիս բեմում: Կայքը նաև հավելել է, որ սա Ազնավուրի 51-րդ ալբոմն է:

la-croix.com-ն էլ նշում է, որ Ազնավուրը զուգերգ է ձայնագրել բրիտանացի Բենջամին Քլեմենտինի հետ, որը կոչվում է «You've got to learn»: Այն ևս զետեղվել է «Encores» ալբոմում: Կայքը նաև հավելել է, որ Ազնավուրը նախատեսել է մի շարք համերգներով սեպտեմբերին հանդես գալ Փարիզում:

parismatch.com-ն էլ ընդգծել է, որ 90 տարեկանում Ազնավուրը հիասքանչ և ոգեշնչող ալբոմ է ներկայացրել:

Ամենահայտնի հայի ալբոմը մայիսի 4-ից հասանելի է հանրությանը: 12 երգ ներառող նոր ձայնասկավառակում ամփոփվում է Ազնավուրի հավերժական երիտասարդությունը, ուժեղ բնավորությունը՝ խառնված ուրախությամբ, պարզությամբ և անմեղությամբ:

Ազնավուրի նոր ալբոմի երգերն են՝

1. Avec un brin de nostalgie 2. Ma vie sans toi 3. Les petits pains au chocolat 4. T'aimer 5. Des ténèbres à la lumière 6. Et moi je reste là 7. Mon amour je te porte en moi 8. Chez Fanny 9. Sonnez les cloches 10. La maison rose 11. De la môme à Edith 12. You've got to learn (զուգերգ Բենջամին Քլեմենտինի հետ)

Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը ծնվել է 1924 թվականի մայիսի 22-ին Փարիզում: Բազմաթիվ հայտնի գործերի հեղինակ և կատարող է: Վաճառվել է Ազնավուրի ստեղծագործություններն ամփոփող շուրջ 100 միլիոն ձայնապնակ: 2009 թվականից Ազնավուրը Շվեյցարիայում Հայաստանի դեսպանն է, ինչպես նաև Ժնևի ՄԱԿ-ի գրասենյակում և այլ միջազգային կազմակերպություններում Հայաստանի մշտական ներկայացուցիչը: Լեգենդար երգիչը նախորդ տարի տոնեց իր ծննդյան 90-րդ հոբելյանը, համերգներ ունեցավ աշխարհի մի շարք երկրներում, այդ թվում` ելույթ ունեցավ նաև Հայաստանում: