ԵՐԵՎԱՆ, 5 ՄԱՅԻՍԻ, ԱՐՄԵՆՊՐԵՍ: Ազգային ճակատի հիմնադիր Ժան Մարի Լը Պենը չի ցանկանում, որ կուսակցության այժմյան առաջնորդն ու իր դուստրը՝ Մարին Լը Պենը հաղթի 2017 թվականի նախագահական ընտրություններում: Այս մասին, ինչպես տեղեկացնում Է «Արմենպրես»-ը, նա հայտարարել Է «Եվրոպա-1» ռադիոկայանի եթերում:

«Իսկական սկանդալ կլիներ, եթե նման բարոյական սկզբունքներով մարդիկ սկսեին գլխավորել Ֆրանսիայի պետությունը: Այս պահին ես դեմ եմ դրան»,- ասել Է Լը Պենը՝ պատասխանելով դստեր հետ հարաբերությունների վատթարացման վերաբերյալ հարցին: Նախօրյակին Ազգային ճակատի հիմնադիրը հրապարակավ հայտարարել Է կուսակցությունից հրաժարվելու ցանկության մասին այն բանից հետո, երբ գործադիր խորհրդի որոշմամբ դադարեցվել Է նրա անդամակցությունը սադրիչ արտահայտությունների համար:

«Ես դա համարում եմ ուխտադրժություն, եւ, պետք Է ասեմ՝ ամաչում եմ, որ Ազգային ճակատի նախագահը կրում Է իմ ազգանունը»,- հայտարարել Է Լը Պեն Ավագը: Ազգային ճակատի հիմնադիրն իր դստերը մաղթել Է շտապ ամուսնություն՝ անձնագրային տվյալները փոխելու համար, հաղորդել Է ՏԱՍՍ-ը: