ԼՂՀ ֆինանսների փոխնախարարը պարզաբանել է ՀՀ-ից ստացած 20 մլն դոլար վարկի նպատակները
ՍՏԵՓԱՆԱԿԵՐՏ, 18 ԱՊՐԻԼԻ, ԱՐՄԵՆՊՐԵՍ։ Հաշվի առնելով մամուլում տեղ գտած հրապարակումներն ու մեկնաբանությունները ՀՀ կառավարության կողմից Արցախի Հանրապետության կառավարությանը 20 մլն դոլար բյուջետային վարկ տրամադրելու վերաբերյալ` հարցը մեկնաբանել է ԼՂՀ ֆինանսների փոխնախարար Գրիգորի Մարտիրոսյանը:
Ինչպես հաղորդում է «Արմենպրես»-ը՝ վկայակոչելով «Արցախպրես»-ը, փոխնախարարի պարզաբանմամբ՝ ՀՀ կառավարության որոշմամբ՝ ԼՂՀ կառավարությանը 20 մլն ԱՄՆ դոլարի չափով, տարեկան 8 տոկոս տոկոսադրույքով բյուջետային վարկը տրամադրվում է լրացուցիչ, և որևէ առնչություն չունի Լեռնային Ղարաբաղի Հանրապետությանը տրամադրվող ամենամյա միջպետական վարկի հետ, որն ընթացիկ տարում նախատեսված է 45.5 մլրդ դրամ, և ԼՂՀ-ն այն շարունակում է ստանալ սահմանված կարգով և ժամկետներում:
«Ի դեպ, նշյալ ամենամյա միջպետական վարկի որոշակի մասը, ըստ էության, անուղղակիորեն փոխհատուցում է ԼՂՀ տնտեսվարող սուբյեկտների կողմից ՀՀ մաքսային սահմանին վճարված հարկերն ու մաքսատուրքերը:
ԼՂՀ կառավարության կողմից ստացված` 8 տոկոս տոկոսադրույքով բյուջետային վարկը նախատեսվում է ուղղել տնտեսական և հիփոթեքային ծրագրերի իրագործմանը»,- ասաց Գ. Մարտիրոսյանը՝ հավելելով, որ մասնավորապես, «Գյուղի և գյուղատնտեսության աջակցության», «Արցախի ներդրումային» և նորաստեղծ «Արցախի սոցիալական ծրագրերի» հիմնադրամներն իրականացնում են բազմաթիվ ծրագրեր` ուղղված գյուղատնտեսության, փոքր և միջին ձեռնարկատիրության աջակցությանն ու հիփոթեքային վարկավորման սուբսիդավորմանը, որոնց գումարները ներգրավվում են բանկային ռեսուրսներից՝ շատ ավելի բարձր տոկոսներով, իսկ կառավարությունը մասնակի սուբսիդավորում է այդ վարկերի սպասարկումը:
«Այսպիսով` հիշատակված բյուջետային վարկը շահավետ այլընտրանք է հանդիսանում բարձր շուկայական տոկոսադրույքներով բանկային միջոցներին, և ուղղվելու է այդ ծրագրերի ֆինանսավորմանը: Հետևաբար, միայն կարելի է ողջունել այն փաստը, որ պետական բյուջեից ավելի քիչ միջոցներ կուղղվեն տոկոսների սուբսիդավորմանը:
Ինչ վերաբերում է պետական բյուջեից վճարվող աշխատավարձերին, թոշակներին ու այլ սոցիալական վճարներին` կարող ենք փաստել, որ պետական բյուջեով նախատեսված եկամտային ու ծախսային հոդվածներն այս պահին կատարվում են ըստ նախատեսված ժամանակացույցի և ծավալների»,- խոսքը եզրափակեց ԼՂՀ ֆինանսների նախարարի տեղակալը: