ԳՅՈՒՄՐԻ, 14 ՀՈՒՆՎԱՐԻ, ԱՐՄԵՆՊՐԵՍ: Ողջ Գյումրին սգում է Ավետիսյանների հարազատների հետ: Գյումրեցիների հոսքը Սբ Նշան եկեղեցի չի դադարում: Այն բանից հետո, երբ  հունվարի 13-ին երեկոյան  դաժանաբար սպանված Ավետիսյանների ընտանիքի անդամների աճյունները տեղափոխվեցին եկեղեցի, այն, ինչ կատարվում է եկեղեցում, աննկարագրելի է: Եկեղեցու մուտքի մոտ հերթապահում են շտապ բուժօգնության բրիգադները, իսկ Աբովյան փողոցը, որտեղ գտնվում է եկեղեցին, հսկվում ՀՀ  ՃՈ կողմից:

«Բոլորս Ավետիսյան ենք: Սա մեր վիշտն ու ցավն է» խոսքերով մարդիկ շարժվում են դեպի եկեղեցի: Եկեղեցում ավելի ուշ, հունվարի 14-ին ժամը 17:00-ին կկատարվի հոգեհանգստի կարգ, իսկ հուղարկավորությունը՝ հունվարի 15-ին ժամը 13:00-ին:

Շիրակի մարզպետի հրահանգով ստեղծվել է մարզային ու քաղաքային իշխանությունների ներկայացուցիչներից կազմված համատեղ աշխատանքային խումբ, որը կկանոնակարգի հունվարի 12-ին Գյումրիում դաժանաբար սպանված Ավետիսյանների ընտանիքի անդամների հոգեհանգստի և հուղարկավորության հետ կապված աշխատանքները: Աշխատանքային խումբը  ղեկավարում է Շիրակի մարզպետ Ֆելիքս Ցոլակյանը: