Մեղրիում կառուցվում է առողջապահական համալիր
ՄԵՂՐԻ, 22 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ կառավարության որոշմամբ նախատեսված է` դեռեւս 2013թ. հունիսին սկսված Մեղրիի առողջապահական համալիրի շինարարությունն ավարտին հասցնել եկող տարվա հունիսին: Սակայն, շինաշխատանքներն իրականացնող «Պարեքս» ՍՊԸ-ն, թերանալով ստանձնած պարտականություններում, շինարարության ավարտը հետաձգել է մեկ տարով:
Համալիրի շինաշխատանքների ժամանակ ծագած խնդիրներին տեղում ծանոթանալու, եւ դրանց լուծումներ տալու նպատակով Սյունիքի մարզպետ Սուրիկ Խաչատրյանը, ՀՀ առողջապահության նախարարության «Առողջապահական ծրագրերի իրականացման գրասենյակ»-ի տնօրեն Նելսոն Զուլոյանի հետ հոկտեմբերի 22-ին եղել է Մեղրիում: Մինչ այդ, աշխատանքային հանդիպման ժամանակ համատեղ քննարկել են համալիրի կառուցման ընթացքին առնչվող հարցեր: Շինարարական աշխատանքները վստահվել են «Մեղրիի ՃՇՇՁ» ՓԲԸ-ին, որը համաձայնել է ոչ միայն նշված ժամկետում ավարտին հասցնել շինարարությունը, այլեւ այն իրականացնել պահանջվող որակական չափանիշներին համապատասխան:
Գոհար Իսախանյան