«Երկրները մեկ հարկի տակ» ծրագրի շրջանակում անցկացվել է գործնական հանդիպում
ԵՐԵՎԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի քաղաքապետարանում տեղի ունեցած «Երկրները մեկ հարկի տակ» ցուցահանդես-համաժողով-փառատոնի շրջանակում Երևան ժամանած գործարարների խմբի հետ հանդիպմանը Երևանի քաղաքապետարանի աշխատակազմի զարգացման և ներդրումային ծրագրերի վարչության պետ Արմեն Հարությունյանը, Երևանի քաղաքապետ Տարոն Մարգարյանի անունից ողջունելով ներկաներին, ներկայացրել է մայրաքաղաքի ներդրումային առաջնահերթություններն ու հեռանկարները` նշելով, որ քաղաքապետարանը մշտապես պատրաստակամ է աջակցել քաղաքային տնտեսության զարգացմանն ուղղված նախաձեռնություններին ու գործնական առաջարկներին:
Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, Երևանի քաղաքապետարանի մշակույթի և տուրիզմի վարչության Տուրիզմի բաժնի պետ Մարիա Բարաղամյանը հակիրճ անդրադարձել է Երևանում զբոսաշրջության զարգացման հեռանկարներին` ընդգծելով, որ զբոսաշրջությունը թեև մայրաքաղաքի նոր զարգացող ուղղություններից է, սակայն մեծ ներուժ և հեռանկար ունի: «Երևան քաղաքի կառավարման տեխնոլոգիաներ» ՓԲԸ-ի տնօրեն Սարգիս Մանուկյանն էլ ներկայացրել է մայրաքաղաքի կառավարման գործում կիրառվող տեղեկատվական տեխնոլոգիաները և այս ուղղությամբ նախատեսվող ծրագրերը:
Շնորհակալություն հայտնելով ջերմ ընդունելության համար՝ հյուրերը ներկայացրել են Երևանում գործարարությամբ զբաղվելու իրենց ուղղությունների մասին: Հանդիպմանը ներկա ֆրանսահայ գործարար Հակոբ Կոշեցյանը նշել է, որ հատկապես տուրիզմի և տեղեկատվական տեխնոլոգիաների ոլորտում Երևանի նկատմամբ հետաքրքրությունների շրջանակը մեծ է: Համագործակցության կոնկրետ ուղղությունների մասին Երևանի քաղաքապետարանի ներկայացուցիչներն ու գործարարները պայմանավորվել են խոսել նաև սեպտեմբերի 20-ին բացվող «Երկրները մեկ հարկի տակ» ցուցահանդես-համաժողով-փառատոնի ընթացքում: