Սերժ Սարգսյանը մասնակցել է ԱԻ նախարարության նոր մասնաշենքի բացման հանդիսավոր արարողությունը
ԵՐԵՎԱՆ, 25 ՀՈՒՆՎԱՐԻ, ԱՐՄԵՆՊՐԵՍ: ՀՀ արտակարգ իրավիճակների նախարարության նոր մասնաշենքի բացման հանդիսավոր արարողությանը ներկա են եղել ՀՀ Նախագահ Սերժ Սարգսյանը, Ն. Ս. Օ. Տ. Տ Գարեգին 2-րդը, կառավարության անդամներ, այլ բարձրաստիճան հյուրեր, օտարերկրյա գործընկերներ:
Ինչպես «Արմենպրես»-ին տեղեկացրին ՀՀ արտակարգ իրավիճակների նախարարությունից, միջոցառման ժամանակ ՀՀ Նախագահը ողջունել է հրապարակում շարված փրկարարներին, որից հետո սկսվել է նորակառույց շենքի օրհնության արարողությունը։
ՀՀ Նախագահ Սերժ Սարգսյանը ՀՀ ԱԻ նախարար Արմեն Երիցյանի ուղեկցությամբ շրջել է նորակառույց շենքի հարկաբաժիններում և այցելել ճգնաժամային կառավարման կենտրոն` ծանոթանալով ստորաբաժանումների գործունեությանը, աշխատանքային պայմաններին, տեխնիկական զինվածությանը և հնարավորություններին։
ՀՀ Նախագահի հանձնարարականի համաձայն` ճգնաժամային կառավարման կենտրոնում և «911» ծառայությունում ստեղծվել է 30 հաշմանդամի աշխատատեղ, ևս 11 հաշմանդամ ներկայում փորձաշրջան է անցնում կենտրոնում։
Նոր շենքին ծանոթանալուց հետո ՀՀ նախագահը շրջել է արտակարգ իրավիճակների արագ արձագանքման վրանային ճամբարում, որը հագեցած է փրկարարական աշխատանքների, աղետների բժշկության, կոմունալ-կենցաղային բոլոր հարմարություններով և տեխնիկական նորագույն միջոցներով (զորանոց, խոհանոց, բուժկետ, շարժական սառնարան, շարժական բաղնիք և այլն)։ Երկրի նախագահին ներկայացվել է նաև ԱԻՆ դաշտային հոսպիտալը։