ԱՄՆ Հայ դատի հանձնախումբը մտահոգված է ԱՄՆ պաշտպանության նախարարի պաշտոնում Չակ Հեյգլի հնարավոր առաջադրմամբ
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Ամերիկայի Հայ դատի հանձնախումբը լուրջ մտահոգված է ԱՄՆ պաշտպանության նախարար Չակ Հեյգլի` Հայոց ցեղասպանության վերաբերյալ ունեցած դիրքորոշմամբ:
Ինչպես հաղորդում է «Արմենպրես»-ը` վկայակոչելով ամերկյան «Commentary» պարբերականը, Վաշինգտոնում մեծ թվով դաշնակիցներ ունեցող Հայ համայնքի դժգոհությունները նախկին սենատոր Չակ Հեյգլի գործունեության նկատմամբ կարող է մտահոգություններ առաջացնել նաև ԱՄՆ Սենատում` վերջինիս պաշտպանոթյան նախարար նշանակվելու հնարավոր քննարկումների ժամանակ:
«Մեզ մտահոգոմ է, որ նախկին սենատոր Հեյգլը հավատում է Թուրքիայի խաբեություններին Հայոց ցեղասպանության վերաբերյալ: Դիրքորոշում, որը շարունակում է ձևավորել Թուրքիայի Հանրապետության ներկայիս քաղաքականությունը Հայաստանի և տարածաշրջանի այլ երկրների նկատմամբ»,- նշել է Հայ դատի հանձնախմբի գործադիր տնօրեն Արամ Համբարյանը:
Չակ Հեյգլը շարունակաբար դեմ է արտահայտվել ԱՄՆ-ի կողմից Հայոց ցեղասպանության ճանաչմանը և 1915թ-ի դեպքերը չի որակել «ցեղասպանություն»:
«Հարցն այն է, որ տարածաշրջանը պետք է առաջ շարժվի: Անհրաժեշտ է կայուն խաղաղ հարաբերություններ հաստատել Թուրքիայի, Հայաստանի և տարածաշրջանի մյուս երկրների միջև: Ես վստահ չեմ, որ դեպի անցյալ նայելով կարող ենք խաղաղություն հաստատել»,- նշել էր Հեյգլը:
Հայ դատի հանձնախումբը հակադարձել է սենատորի այս պնդումներին: «Քանի դեռ Էրդողանն ու նրա դաշնակիցները փորձում են խաղաղություն կառուցել Հայոց ցեղասպանության ժխտման վրա, իրենք երբեք հաջողության չեն հասնի: ԱՄՆ և համաշխարհային հանրությունը պետք է օրինակ ծառայեն` դատապարտելով բոլոր ցեղասպանությունները որտեղ և երբ էլ նրանք տեղի ունեցած լինեն»,- հավելել է Համբարյանը: