Օրենքով պետք է պատասխան տա. Գրումրու քաղաքապետը՝ ավտոմեքենայով քաղաքապետարանի աստիճաններին բարձրանալու դեպքի մասին
ԳՅՈՒՄՐԻ, 21 ԱՊՐԻԼԻ, ԱՐՄԵՆՊՐԵՍ: «Mercedes» մակնիշի ավտոմեքենայի վարորդը մարտի 21-ին առավոտյան ժամը 10։30-ի սահմաններում անկանոն երթևեկել է Գյումրու կենտրոնական հատվածում, վարել մայթերով, այնուհետև մեքենայով հայտնվել քաղաքապետարանի աստիճաններին ու հրաժարվել կատարել պարեկային ծառայողների՝ մեքենայից դուրս գալու, մեքենան հեռացնելու պահանջը:
Քաղաքապետարանի աստիճաններին հայտնված վարորդի պահանջը եղել է Գյումրու քաղաքապետի հետ հանդիպումը։ «Արմենպրես»-ի թղթակցի հաղորդմամբ՝ այս մասին լրագրողների հետ ունեցած ճեպազրույցի ժամանակ նշեց Գյումրի համայնքի ղեկավար Վարդգես Սամսոնյանը, վստահեցնելով՝ բարկացած է կատարվածից։
«Ես գիշեր-ցերեկ ազատ ընդունելություն անում եմ, փողոցով զբոսնում եմ, թող գան մոտենան, իրենց խնդիրը բարձրացնեն, չի արդարացնում ոչ մի բան: Օրենքի ողջ խստությամբ պետք է պատասխան տա: Հողահատկացում անեն, չանեն, չի արդարացնում նման երևույթը, ով ուզում է լինի, գուցե եղբայրս լինի, պետք է պատասխան տա»,- ճեպազրուցին նշեց Վարդգես Սամսոնյանը՝ հավելելով, որ կընթանա քննություն, ամեն ինչ պարզ կդառնա:
«Օրենքի ամբողջ խստությամբ պետք է պատասխան տա՝ ով ուզում է լինի, որ նման արատավոր երևույթներ այլևս չլինեն»,- հավելեց նա։
«Արմենպրես»-ի թղթակցի տվյալներով՝ ճեպազրույցի պահին վարորդը մեքենայում չի եղել։ Ոստիկանները նրան բերման էին ենթարկել բաժին։
Արմենուհի Մխոյան