ԵՐԵՎԱՆ, 12 ՓԵՏՐՎԱՐԻ, ԱՐՄԵՆՊՐԵՍ: Ազգային կոալիցիոն կուսակցության թեկնածու Ալեքսանդեր Ստուբը հաղթել է Ֆինլանդիայի նախագահական ընտրությունների երկրորդ փուլում։ «Արմենպրես»-ի փոխանցմամբ՝ այս մասին հաղորդում է ՏԱՍՍ-ը։

Նշվում է, որ ըստ Ֆինլանդիայի արդարադատության նախարարության՝ ձայների 100 %-ի հաշվարկից հետո Ստուբն առաջատարն է 51,6 %-ով։ Նախկին արտգործնախարար, խորհրդարանի պատգամավոր Պեկկա Հաավիստոն ստացել է ձայների 48,4 %-ը։ Մասնակցությունը կազմել է 67,6 %:

Ընտրությունների վերջնական արդյունքները Արդարադատության նախարարությունը կհաստատի փետրվարի 14-ին։ Կառավարությունն ընտրությունների արդյունքները կհրապարակի փետրվարի 15-ին՝ լիագումար նիստում։ Հանրապետության նախագահի լիազորությունների ժամկետը կսկսվի մարտին։

55-ամյա Ալեքսանդեր Ստուբը 2008-2010 թվականներին զբաղեցրել է արտաքին գործերի նախարարի պաշտոնը։ 2010–2014 թվականներին եղել է ԵՄ հարցերի և արտաքին առևտրի նախարար: 2014-2015 թվականներին գլխավորել է Ֆինլանդիայի կառավարությունը։ 2020 թվականից նա թողել է քաղաքականությունը և դասավանդել Ֆլորենցիայում ԵՄ համալսարանի Անդրազգային կառավարման դպրոցում: