Կյանքից հեռացել է արձակագիր, դրամատուրգ, ռեժիսոր Ռուբեն Մարուխյանը
ԵՐԵՎԱՆ, 8 ՀՈՒՆՎԱՐԻ, ԱՐՄԵՆՊՐԵՍ։ Կյանքից հեռացել է Հայաստանի գրողների, թատերական գործիչների և ժուռնալիստների միությունների անդամ, ճանաչված արձակագիր, դրամատուրգ, ռեժիսոր Ռուբեն Մարուխյանը։ «Արմենպրես»-ի փոխանցմամբ՝ այս մասին հաղորդագրություն են տարածել Հայաստանի Գրողների և Թատերական գործիչների միությունները։
Ռուբեն Մարուխյանի հոգեհանգիստը տեղի կունենա հունվարի 9-ին ժամը 17-ից, Նուբարաշենի խճուղի 46 հասցեում։
Հուղարկավորությունը՝ հունվարի 10-ին ժամը 13-ին, նույն տեղից։
Ռուբեն Մարուխյանը հեղինակ է ավելի քան 25 գրքի և չորս տասնյակից ավելի բեմադրությունների։ Նրա պիեսները բեմադրվել են հանրապետության պետական թատրոններում, ռադիո և հեռուստաթատրոններում ու արտերկրում։ Նրա ստեղծագործությունները թարգմանվել և տպագրվել են ռուսերեն, անգլերեն, ֆրանսերեն, իտալերեն և այլ լեզուներով։