Թուրքիայի դեմ խաղում պարտավոր ենք հաղթել. Ժիրայր Շաղոյան
ԵՐԵՎԱՆ, 20 ՄԱՐՏԻ, ԱՐՄԵՆՊՐԵՍ: Հայաստանի ֆուտբոլի ազգային թիմի անդամ Ժիրայր Շաղոյանի կարծիքով Հայաստանի հավաքականը պարտավոր է հաղթել Թուրքիայի թիմին:
«Հայաստանի հավաքականի նորեկները մեծ ներդրում ունեն թիմում, քանի որ ակտիվ ֆուտբոլիստներ են: Նրանք կարող են օգուտ տալ հավաքականին: Թուրքիայի դեմ խաղում պարտավոր ենք հաղթել: Ունենք լուրջ ֆուտբոլիստներ, որոնց հետ կարող ենք հաղթանակի հասնել»,-«Արմենպրես»-ի հաղորդմամբ` լրագրողների հետ զրույցում ասաց Շաղոյանը:
Անդրադառնալով նոր մարզչի հետ աշխատանքին` կիսապաշտպանն ընդգծեց, որ Հայաստանի հավաքականը կարող է նոր մարզչի բերած փիլիսոփայությամբ հաղթանակի հասնել:
Հայաստանի ֆուտբոլի ազգային թիմը մարտի 25-ին Երևանում կընդունի Թուրքիայի ազգային թիմին: Հանդիպումը կկայանա Վազգեն Սարգսյանի անվան Հանրապետական մարզադաշտում: Խաղը կմեկնարկի Երևանի ժամանակով 21:00-ին: