Թուրքիայի կառավարության առաջիկա նիստում կքննարկվի նաև Հայաստան-Ադրբեջան հարաբերությունների հարցը
ԵՐԵՎԱՆ, 11 ԱՊՐԻԼԻ, ԱՐՄԵՆՊՐԵՍ։ Թուրքիայի կառավարության ապրիլի 12-ին կայանալիք նիստի օրակարգում ընդգրկված է նաև Հայաստան-Ադրբեջան հարաբերությունների քննարկումը։ Այս մասին, ինչպես հաղորդում է «Արմենպրես»-ը, հայտնում է թուրքական Hurriyet-ը։
Տեղեկության համաձայն՝ Ռուսաստանի և Ուկրաինայի միջև տեղի ունեցող գործողությունները լինելու են նիստի առաջնահերթ թեմաներից, ինչպես եղել է վերջին մի քանի նիստերում։
Գնահատվելու են Թուրքիայի դիվանագիտական ջանքերը ՌԴ և Ուկրաինայի ղեկավարներին մի սեղանի շուրջ բերելու և մշտական հրադադարի հասնելու համար։
Կառավարության օրակարգում լինելու են նաև արտաքին քաղաքականության և տարածաշրջանային այլ հարցեր։
Գնահատվելու են Ադրբեջանի և Հայաստանի միջև խաղաղության գործընթացի հնարավոր մեկնարկը, ՆԱՏՕ-ի անդամ երկրների հետ առաջիկա ժամանակահատվածում պաշտպանական արդյունաբերության ոլորտում ձեռնարկվելիք համատեղ քայլերը, Սիրիայում և Արևելյան Միջերկրական ծովում տեղի ունեցող զարգացումները։
Թուրքիայի ներքին կյանքին վերաբերող հարցերում առաջին պլան մղվող թեմաներից են լինելու տնտեսությանը վերաբերող հարցերը։
Քննարկվելու են բարձր գնաճի դեմ ձեռնարկվելիք միջոցները։