Մեր հասարակությունը պետք է հասկանա, որ պարեկային ծառայողին կաշառք առաջարկելը հանցագործություն է. Ումրշատյան
ԵՐԵՎԱՆ, 14 ՀՈՒՆՎԱՐԻ, ԱՐՄԵՆՊՐԵՍ: Պարեկային ծառայության կատարած աշխատանքի գնահատականը պետք է տա հասարակությունը և, հասարակության գնահատականի վրա հիմնվելով, ծառայությունը պետք է զարգացնել: «Արմենպրես»-ի հետ զրույցում այս մասին ասաց Ոստիկանության պարեկային ծառայության պետ Արթուր Ումրշատյանը:
Ամփոփելով Պարեկային ծառայության կազմավորումից ի վեր կատարած աշխատանքի թվային տվյալները` Ումրշատյանը նշեց, որ ծանր մարմնական վնասվածքներով և մահվան ելքով վթարների դեպքերը նվազել են: 2021 թվականի հուլիսի 7-ից մինչև դեկտեմբերի 31-ը նախորդ տարվա նույն ժամանակահատվածի նկատմամբ Պարեկային ծառայությունն արձանագրել է ճանապարհատրանսպորտային 10945 ճանապարհատրանսպորտային պատահար նյութական վնասով, մարմնական վնասով 919, գրանցվել է 37, 1147 վիրավոր: Նույն ժամանակահատվածի համար ճանապարհային ոստիկանության 1-ին սպայական գումարտակի կողմից արձանագրվել է նյութական վնասով 10800, մարմնական վնասով 832 դեպք, գրանցվել է 46 զոհ, 1052 վիրավոր:
Պարեկային ծառայության պետը նշեց, որ Երևանում տարածված բնակարանային գողությունները նույնպես բավականին նվազել են, որն, ըստ նրա, կապված է 24-ժամյա ծառայության հետ:
Ոստիկանության գնդապետի խոսքով` եղել են դեպքեր, երբ քաղաքացիները պարեկային ծառայողին կաշառք են առաջարկել, և պարեկային ծառայողը կաշառքի փորձի դեպքով բերման է ենթարկել տվյալ քաղաքացուն և հարուցվել է քրեական գործ:
«Հասարակությունը պետք է հասկանա, որ պարեկային ծառայողին կաշառք տալով՝ կատարում է հանցագործություն, և դա հստակ արձանագրվելու է, քաղաքացին պատասխանատվության է ենթարկվելու»,- ընդգծեց Ումրշատյանը:
Ոստիկանության գնդապետը շեշտեց` ծառայության հիմնական նպատակն է հասարակության ապահովվածության զգացումը բարձրացել, իսկ դրա համար շատ կարևոր է, որ հանցագործությունները ոչ թե տեղի ունենան, այլ կանխարգելվեն պարեկային ծառայողի ներկայությամբ, իսկ տեղի ունեցած հանցագործություններն էլ շատ օպերատիվ արձագանք ստանան և բացահայտվեն:
«Այսինքն` մեր հասարակության մեջ վստահությունը ոստիկանության հանդեպ պետք է օրեցօր էլ ավելի բարձրանա, և հասարակությունը ոստիկանության մեջ տեսնի իրեն պահպանողի և ծառայություն մատուցողի, որը մեր կարգախոսն է` Պահպանել և ծառայել»,- ասաց Ումրշատյանը:
Պարեկային ծառայությունը կներդրվի նաև Լոռու և Շիրակի մարզերում, դիմորդները արդեն անցնում են 5-ամսյա դասընթացներ և ապրիլից կանցնեն ծառայության:
Կարեն Խաչատրյան