ՄԱԿ-ի ՊՀԾ-ն և Երեմյան Փրոջեքսթը պարենի արժեշղթաների կարևորության վերաբերյալ կիսում են միևնույն տեսլականը
ԵՐԵՎԱՆ, 29 ԴԵԿՏԵՄԲԵՐԻ, ԱՐՄԵՆՊՐԵՍ: Պարենային արժեշղթաները կարևոր դեր ունեն Հայաստանում աղքատության և թերսնման մակարդակի նվազեցման, և միևնույն ժամանակ երկրում պարենային ապահովության բարձրացման համար։ Նպատակ ունենալով մեծացնել պարենային ազգային ապահովությունը և դրանով իսկ նպաստել երկրի տնտեսական աճին՝ 2019 թվականից սկսած՝ ՄԱԿ-ի Պարենի Համաշխարհային Ծրագիրը (ՊՀԾ) ներդրումներ է կատարել Հայաստանի պարենային արժեշղթաներում։
Պարենամթերքի որակի և անվտանգության ապահովման նպատակով «Երեմյան Փրոջեքթս» ընկերությունը ևս նույն թվականից մեկնարկել և իրագործում է «Սերմից` սեղան» մոտեցման վրա հիմնված բիզնես-զարգացման նոր ռազմավարություն, ինչը հատկապես կարևորվում է ՊՀԾ-ի առաքելության համատեքստում։
Կարևորելով մասնավոր հատվածի կազմակերպությունների ակտիվ ներգրավվածությունը պարենային արժեշղթաներ ստեղծելու գործում՝ ՊՀԾ-ի հայաստանյան գրասենյակի տնօրեն և ներկայացուցիչ Ելենա Միլոշևիչն այցելել է «Երեմյան Փրոջեքսթ»-ի՝ Վայոց Ձորում գործող տոհմային տավարաբուծական ֆերմա։
Այցի ընթացքում Ելենա Միլոշևիչը շրջել է ֆերմայով և ծանոթացել ինչպես արտադրության գործընթացին, այնպես էլ սպասվող ծրագրերին։ Բացի այդ, ՊՀԾ-ի հայաստանյան գրասենյակի ղեկավարը և «Երեմյան Փրոջեքսթ» ընկերության գլխավոր տնօրեն Դավիթ Երեմյանը քննարկել են միմյանց հետ հետագա համագործակցության հնարավորություններն ու հեռանկարները։
«Սերմից՝ սեղան»-ը պարենային անվտանգության ապահովման տեսանկյունից կարևորագույն մոտեցում է, որով աշխարհում առաջնորդվում են պարենի և գյուղատնտեսության ոլորտների մի շարք կազմակերպություններ։ Այն հնարավորություն է տալիս կազմակերպություններին վերահսկել սննդի արտադրության ամբողջ շղթան՝ սերմի ցանումից մինչև պատրաստի արտադրանքի սեղան հասնելը, և ստեղծել որակյալ պարենամթերք։
«Սերմից՝ սեղան»-ը ՄԱԿ-ի Պարենի Համաշխարհային Ծրագրի պարենային ազգային ապահովության խթանման ռազմավարության կարևորագույն բաղադրիչներից է, քանի որ միտված խթանել պարենային ապահովությունը՝ կառուցելով տեղական արտադրության վրա հիմնված սննդի արժեշղթաներ։