Կան շինարարներ, որոնք նոր խողովակ ասվածը հասկանում են ներկած խողովակ. Գնել Սանոսյան
ԵՐԵՎԱՆ, 2 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարությունը համայնքների տնտեսական և սոցիալական ենթակառուցվածքներին զարգացմանն ուղղված սուբվենցիոն ծրագրերի շրջանակներում 40 ծրագրերի իրականացման համար 885 միլիոն 178 հազար դրամ կհատկացնի 36 համայնքներին:
«Արմենպրես»-ի հաղորդմամբ` Կառավարությունը նման որոշում կայացրեց դեկտեմբերի 2-ի նիստի ժամանակ:
«40 ծրագրերով նախատեսված աշխատանքները համայնքներն իրենց մասով ֆինանսավորել են և պետական ֆինանսավորման անհրաժեշտություն է առաջացել: Ծրագրերը իրականացվելու են Արարատի, Արմավիրի, Գեղարքունիքի, Կոտայքի, Լոռու և Շիրակի մարզերում: Ակնկալվում է այս ծրագրով շինարարներին գումար հատկացնել` ոմանք աշխատանքները ավարտել են, ոմանք ավարտելու փուլում են գտնվում»,- ասաց Տարածքային կառավարման և ենթակառուցվածքների նախարար Գնել Սանոսյանը:
Վարչապետը հետաքրքրվեց` որքանով կարելի է համոզվել, որ սուբվենցիոն ծրագրերը պատշաճ որակով են իրականացվում: Գնել Սանոսյանն ասաց, որ նման խնդիր կա, և լրջագույն ուշադրություն է դարձվում շինարարության որակին:
« Նախարարությունն ունի համապատասխան աշխատակիցներ, ովքեր մարզային և տեսչական գործընկերների հետ այցեր են կատարում համապատասխան շինհրապարակներ: Ցավոք, պետք է ասել, որ բավական դեպքեր ունենք, որտեղ նախագծային և շինարարական թերություններ կան, ունենք դեպքեր, որոնք շտկելի են, և շինարարներին տրվում է ժամկետ, որպեսզի շտկեն… Ցավոք, մեր երկրում դեռ կան շինարարներ, որոնք նոր խողովակ ասվածը հասկանում են ներկած խողովակ, մենք այդպիսի դեպքերը փորձում ենք թույլ չտալ և բավականին խիստ կվարվենք»,- եզրափակեց Սանոսյանը: