«Հայկական Ռոմանսիադա» մրցույթի հաղթողը Մոսկվայում տեղի ունեցող ռոմանսի երիտասարդ կատարողների միջազգային մրցույթում կներկայացնի Հայաստանը
ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: Սերգեյ Ռախմանինովի, Պյոտր Չայկովսկու, Էդուարդ Միրզոյանի և Էդուարդ Աբրահամյանի ռոմանսներով Հայաստանի երաժշտական բուհերի ուսանողները մասնակցել են II-րդ «Հայկական Ռոմանսիադա»-ին:
«Արմենպրես»-ի փոխանցմամբ՝ այս մասին հայտնում են Երևանում «Դոմ Մոսկվի» կենտրոնից, նշելով, որ ռուսական ռոմանսի պահպանման «Ռոմանսիադա» բարեգործական հիմնադրամի նախաձեռնությամբ և ԿԳՄՍ նախարարության աջակցությամբ Հայաստանում երկրորդ անգամ անցկացվել է ռոմանսի երիտասարդ կատարողների միջազգային մրցույթի տարածաշրջանային ընտրական փուլը:
Տարածաշրջանային փուլի արդյունքով Երևանում «Դոմ Մոսկվի» կենտրոնում տեղի է ունեցել գալա-համերգ, որտեղ ընտրվել են հայկական «Ռոմանսիադայի» հաղթողները: Մրցանակակիրներն արժանացել են դափնեկիրների կոչումներին, ինչպես նաև՝ ստացել են դիպլոմներ և մրցանակներ:
Մրցույթի նպատակն է՝ որպես երաժշտական ուղղություն տարածել ռուսական ռոմանսի մշակույթն ու զարգացնել ավանդույթները, բացահայտել և աջակցել երիտասարդ տաղանդավոր արտիստներին և կատարողներին։
Մրցույթի հաղթող է ճանաչվել Ալ. Սպենդիարյանի անվան օպերայի ու բալետի ազգային ակադեմիական թատրոնի երիտասարդական օպերային ծրագրի (գեղ.ղեկավար Լևոն Ջավադյան) մենակատար Անի Քուշյանը, ով ներկայացրեց «Աղաչանք» ստեղծագործությունը:
Երկրորդ տեղը կիսել են Երևանի Կոմիտասի անվ․ պետական կոնսերվատորիայի շրջանավարտ Գառնիկ Եղիազարյանը և Սառա Հակոբյանը: Երրորդ տեղում էր Երևանի Կոմիտասի անվ․ պետական կոնսերվատորիայի վոկալի ֆակուլտետի 2-րդ կուրսի ուսանողուհի Սոֆիա Սիմոնյանը:
Մրցույթին գնահատվում էր հեղինակային ոճը, արտիստիզմը, մասնագիտական հմտությունները և անհատականությունը։
«Ռոմանսիադան Ռուսաստանի և Հայաստանի մայրաքաղաքների միջև մշակութային սերտ համագործակցության վառ ապացույցն է: Մրցույթը դարձել է ավանդական՝ նպաստելով ռուսական ռոմանսի առավել զարգացմանն ու տարածմանը, ինչպես նաև ստեղծվում են կապեր և համագործակցություններ տարբեր երկրների մշակութային գործիչների միջև։ Մենք ունենք նաև ազգային ռոմանս անվանակարգ, որը շնորհվում է հայկական ռոմանսի կատարման համար»,- նշել է Երևանում «Դոմ Մոսկվի» կենտրոնի գլխավոր տնօրեն Վահրամ Կարապետյանը։
Մրցույթի ժյուրին գլխավորում էին ՌԴ արվեստի վաստակավոր գործիչ, «Ռոմանսիադա» մրցույթի հիմնադիր և գեղարվեստական ղեկավար Գալինա Պրեոբրաժենսկայան և ՀՀ մշակույթի վաստակավոր գործիչ, Երևանի Կոմիտասի անվան պետական կոնսերվատորիայի պրոֆեսոր, Հայ երաժշտական ընկերակցության նախագահ Դավիթ Ղազարյանը:
«Նախորդ տարի, համավարակով պայմանավորված, մրցույթն օնլայն էր։ Ուրախ եմ, որ Երևանում եմ և իրականում կարող եմ վայելել երիտասարդների գերող և զգայական ելույթները: Օնլայն հարթակները չեն կարող փոխանցել կատարումների հոգին։ Շատ տաղանդավոր ու մեծ ապագայով երիտասարդներ կան։ Ցավոք, ինձ հետ Մոսկվա կարող եմ տանել միայն մեկին»,- նշեց ՌԴ արվեստի վաստակավոր գործիչ և արտիստուհի, «Ռոմանսիադա» մրցույթի հիմնադիր Գալինա Պրեոբրաժենսկայան։
«Ռոմանսիադան տարեցտարի նոր թափ է հավաքում և նոր մակարդակի է բարձրանում ռոմանսի մշակույթը։ Հուսով եմ, որ առաջիկայում մրցույթի աշխարհագրությունը կընդլայնվի՝ ներառելով մասնակիցներ Հայաստանի տարբեր մարզերից», - նշել է Երևանի Կոմիտասի անվան պետական կոնսերվատորիայի պրոֆեսոր, Հայ երաժշտական ընկերակցության նախագահ Դավիթ Ղազարյանը:
Համերգին մասնակցել են նաև Ռուսաստանից հրավիրված արտիստներ, բազմաթիվ երգի մրցույթների դափնեկիրներ Պոլինա Գարաևան և Վասիլիսա Շապլիկոն: Որպես հյուր ներկայացավ նաև անցյալ տարվա հայկական «Ռոմանսիադայի» հաղթող Տիգրան Մելքոնյանը։
Մրցույթի հաղթողը դեկտեմբերին կմասնակցի Մոսկվայում կայանալիք մրցույթի եզրափակչին և կներկայացնի Հայաստանը:
Առաջին «Հայկական Ռոմանսիադան» կայացել է նախորդ տարի: Ռուսական ռոմանսի երիտասարդ կատարողների մրցույթը ստեղծվել է 1996թ.-ին Ռուսաստանի վաստակավոր արտիստ Գ. Ս. Պրեոբրաժենկայայի կողմից: Առաջին Ռոմանսիադան անցկացվել է 1997 թվականին։