Նրանք ընկան, որպեսզի սերունդները շարունակեն արժանապատվորեն ապրել հայրենի հողում. Արցախի նախագահն ընդունել է զոհված ուսուցիչների հարազատներին
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ։ Արցախի Հանրապետության նախագահ Արայիկ Հարությունյանը հոկտեմբերի 5-ին Ուսուցչի օրվա առթիվ ընդունել է 2020 թվականին Ադրբեջանի կողմից Արցախի դեմ սանձազերծված պատերազմի ընթացքում զոհված ուսուցիչների հարազատներին։
«Արմենպրես»-ի փոխանցմամբ՝ այս մասին հայտնում են ԱՀ նախագահի աշխատակազմից՝ նշելով, որ երկրի ղեկավարը, հայտնելով իր խորին ցավակցությունն ու զորակցությունն, ընդգծել է, որ նրանք մշտապես լինելու են պետության ուշադրության կենտրոնում։
«44-օրյա պատերազմը մեզանից խլեց մեր քաջ տղաներին: Հայրենիքի նվիրյալների շարքերում հայտնվեցին շատերիդ գործընկերները, սաները, հարազատները: Նրանք ընկան, որպեսզի կանգուն մնա Արցախը, որպեսզի սերունդները շարունակեն արժանապատվորեն ապրել հայրենի հողում», - նշել է Արայիկ Հարությունյանը։
Հանդիպմանը մասնակցել է նաև ԱՀ կրթության, գիտության, մշակույթի և սպորտի նախարար Լուսինե Ղարախանյանը։