«Թալիբանը» դատապարտում է ահաբեկիչների հարձակումը. զոհերի թիվը հասել է 40-ի
ԵՐԵՎԱՆ, 26 ՕԳՈՍՏՈՍԻ, ԱՐՄԵՆՊՐԵՍ: Աֆղանստանում իշխանությունը վերցրած «Թալիբան» ռադիկալ շարժումը վճռականորեն դատապարտում է Քաբուլի օդանավակայանի մոտ տեղի ունեցած պայթյունները, որոնց հետևանքով զոհվել է առնվազն 40 մարդ և տուժել է 120-ը, «Արմենպրես»-ի հաղորդմամբ՝ հայտարարել է «Թալիբանի» ներկայացուցիչ Զաբիհուլլահ Մուջահիդը՝ շեշտելով, որ թալիբները խոստանում են պատասխանատվության ենթարկել մեղավորներին:
«Մենք համակ ուշադրություն ենք հատկացնում մեր ժողովրդի անվտանգությանն ու պաշտպանությանը, և այս հանցագործության բոլոր մեղավորները հայտնաբերվելու են և խստորեն պատժվեն», - գրել է Մուջահիդը Թվիթերի իր էջում:
Ավելի վաղ «Թալիբանի» ներկայացուցիչը հայտարարել էր, որ Քաբուլի միջազգային օդանավակայանի մոտ տեղի ունեցած հարձակումներն իրականացրել են «Իսլամական պետություն» խմբավորման ահաբեկիչները, և թալիբները նախազգուշացրել էին ամերիկացի զինվորականներին «Իսլամական պետության» հնարավոր հարձակումների մասին: