Քաղաքացիներն ապօրինի հրազեն են հանձնել ՀՀ ոստիկանության Գեղարքունիքի մարզային վարչության ստորաբաժանումներում
ԵՐԵՎԱՆ, 19 ՀՈՒԼԻՍԻ, ԱՐՄԵՆՊՐԵՍ: Ոստիկանության Գեղարքունիքի մարզային վարչության ու ենթակա ստորաբաժանումների ծառայողների բացատրական աշխատանքի շնորհիվ վերջին օրերի ընթացքում արձանագրվել է ապօրինի զենք-զինամթերքի կամավոր հանձնման մի քանի տասնյակ դեպք։
Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապերի և լրատվության վարչությունից, տարբեր անձինք Վարդենիսի բաժնում հանձնել են «Կալաշնիկովի» ինքնաձիգ, ինքնաձիգի պահունակներ, թմբուկավոր ատրճանակ, տարբեր տեսակի նռնակներ՝ պայթուցիչներով, պայթուցիկ նյութ, տարբեր հրազենների ու տրամաչափի 150-ից ավելի փամփուշտ և այլն։
«Գավառի բաժնի ծառայողների բացատրական աշխատանքի շնորհիվ մի խումբ անձինք կամավոր հանձնել են «ՏՕԶ» տիպի հրացան, հրացանի դետալներ, տարբեր տեսակի նռնակներ՝ պայթուցիչներով, ինքնաձիգի պահունակներ, տարբեր հրազենների մի քանի տասնյակ փամփուշտ և այլն։ Արդյունավետ էր նաև Մարտունու բաժնի ծառայողների բացատրական աշխատանքը. արձանագրվել են ինքնաշեն կրակող սարքի, ինքնաձիգի պահունակների, պայթուցիչներով նռնակների, ինչպես և տարբեր հրազենների ու տրամաչափի փամփուշտների կամավոր հանձնման դեպքեր»,- ասվում է հաղորդագրության մեջ։
Ըստ աղբյուրի՝ տարբեր տրամաչափի 200-ից ավելի փամփուշտի, տարբեր տեսակի նռնակների, ինչպես և նռնականետի արկի կամավոր հանձնման դեպքեր են արձանագրվել նաև ոստիկանության Ճամբարակի բաժնում։ Սևանի ոստիկանների բացատրական աշխատանքի շնորհիվ էլ մի տղամարդ հանձնել է «ՏՕԶ» տիպի ակոսափող հրազեն, որը գտել էր գոմի տանիքը մաքրելիս։
Նշանակվել են փորձաքննություններ։
ՀՀ ոստիկանությունը հորդորում է ապօրինի զենք-զինամթերքը կամավոր հանձնել ոստիկանություն՝ քրեական պատասխանատվությունից խուսափելու համար։
Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: