Իսրայելի խոշոր քաղաքներում միացել են օդային տագնապի ազդանշանները
ԵՐԵՎԱՆ, 17 ՄԱՅԻՍԻ, ԱՐՄԵՆՊՐԵՍ: Իսրայելի հարավային խոշոր քաղաքներում կրկին օդային տագնապի ազդանշաններ են միացել:
«Արմենպրես»-ի հաղորդմամբ՝ այս մասին հայտնում է «ՌԻԱ Նովոստի»-ն՝ վկայակոչելով իսրայելական բանակի մամուլի ծառայությանը:
«Օդային տագնապի ազդանշաններ են միացել Աշկելոնում, Աշդոդում, Բեեր-Շեվեում և Գազային սահմանակից բնակավայրերում»,-ասվում է հաղորդագրության տեքստում:
Մայիսի 10-ից Գազայի հատվածի պաղեստինյան խմբավորումների և Իսրայելի բանակի միջև շարունակվում են երկկողմանի հրթիռակոծումները: Վերջին տվյալների համաձայն՝ Իսրայելի կողմից զոհվել է տասը մարդ, հարյուրավորները տուժել են: Պաղեստինի կողմից միայն մեկ շաբաթում հրթիռակոծությունների հետևանքով զոհերի թիվը հատել է 200-ը: Տուժել է ավելի քան 1300 մարդ: