«Արարատ»-ի հաղթանակը տրամաբանական էր . Աբրահամ Խաշմանյան
ԵՐԵՎԱՆ, 16 ՄԱՅԻՍԻ, ԱՐՄԵՆՊՐԵՍ: Երևանի «Ալաշկերտ»-ի գլխավոր մարզիչ Աբրահամ Խաշմանյանը տրամաբանական է համարում «Արարատ»-ի հաղթանակը եզրափակիչում:
«Հանդիպումը մեզ համար հաջող չդասավորվեց հենց խաղի սկզբից, քանի որ արագ գոլ բաց թողեցինք: Փորձեցինք շտկել իրավիճակը, բայց «Արարատ»-ն օգտագործեց իր արագ հակագրոհը և խփեց իր երկրորդ գնդակը»,-«Արմենպրես»-ի հաղորդմամբ` հանդիպման ավարտին` լրագրողների հետ հանդիպման ժամանակ ասաց Խաշմանյանը: Վերջինիս խոսքով` երկրորդ կեսում «Ալաշկերտ»-ն ուներ տարածքային առավելություն, բայց հաշիվը թույլ չէր տալիս առավել հստակ գործել: «Մենք հաջող չխաղացինք այսօր և տրամաբանական էր «Արարատ»-ի հաղթանակը»,-ասաց նա:
Հայաստանի գավաթի խաղարկության եզրափակիչում «Ալաշկերտ»-ը մրցեց «Արարատ»-ի հետ: «Արարատ»-ը Աղվան Պապիկյանի գոլի և Նորի Կոնեի դուբլի շնորհիվ առավելության հասավ 3:1 հաշվով: «Արարատ»-ը 6-րդ անգամ դարձավ Հայաստանի գավաթակիր: