Հանրապետությունում անանսահամաճարակային իրավիճակը կայուն է և վերահսկելի. ՍԱՏՄ ղեկավար
ԵՐԵՎԱՆ, 1 ԴԵԿՏԵՄԲԵՐԻ, ԱՐՄԵՆՊՐԵՍ: Սննդամթերքի անվտանգության տեսչական մարմնի տվյալներով պատերազմը սկսելուց ի վեր Արցախից Հայաստան է տեղափոխվել 9 հազար 616 գլուխ կենդանի: Տեսչական մարմնի ղեկավար Գեորգի Ավետիսյանը չի բացառում նաև դեպքերը, երբ անասունները Արցախից Հայաստան տեղափոխված լինեն ոչ ավտոմեքենաներով, և դա վրիպած լինի տեսչական մարմնի ուշադրությունից:
«Արմենպրես»-ի մամուլի սրահում հրավիրված ասուլիսում այս մասին նշեց Սննդամթերքի անվտանգության տեսչական մարմնի ղեկավար Գեորգի Ավետիսյանը: Նրա խոսքով, Սննդամթերքի անվտանգության տեսչական մարմինը, համապատասխան անասնաբուժական ծառայություններ մատուցող կազմակերպությունները պատկան մարմինների հետ համատեղ պատերազմական պայմաններում սկսել են և մինչ օրս էլ իրականացնում են միջոցառումներ՝ անասնահամաճարակային իրավիճակը, ռազմական գործողությունների գոտուց Հայաստան տեղափոխող կենդանիների, ինչպես նաև մսեղիքի տեղաշարժը վերահսկելու և բնակչությանը կենդանիներից փոխանցվող հիվանդություններից զերծ պահելու համար:
«Համատեղ, օպերատիվ միջոցառումները թույլ տվեցին զերծ մնալ անասնահամաճարակներից: Այս պահին որևէ հիվանդ կենդանի չունենք, մանավանդ, այնպիսի վտանգավոր հիվանդությունով, ինչպիսին է դաբաղը: Միջոցառումները շարունակվում են, այդ բոլոր կենդանիները կպատվաստվեն պետական պատվերով նախատեսված այլ հիվանդությունների նկատմամբ»,-ասաց Գեորգի Ավետիսյանը:
Ամեն դեպքում չեն բացառվում դեպքեր, երբ անասուններ Արցախից Հայաստան տեղափոխված լինեն, ոչ ավտոմեքենաներով, և դա վրիպած լինի տեսչական մարմնի ուշադրությունից: Գեորգի Ավետիսյանը նշեց, որ սերտորեն համագործակցում են ՀՀ էկոնոմիկայի նախարարության հետ, անասնաբույժների միջոցով գյուղերում փորձում են ճշտումներ անել:
«Մեր կարծիքով, գլխաքանակների հետ կապված նշված 9 հազար 616-ն այն թիվը չէ, որ պետք է լիներ: Կլինեն կենդանիներ, որոնք բերվել են սարերով, դաշտերով կարող են մեր աչքից վրիպած լինել: Այժմ այդ ճշտումներն ենք կատարում»,-ասաց Գեորգի Ավետիսյանը:
Տեսչական մարմնի ղեկավարի գնահատմամբ, հանրապետությունում անանսահամաճարակային իրավիճակը կայուն է և վերահսկելի: