ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Մոլդովայում նոյեմբերի 15-ին անցկացվում է նախագահի ընտրությունների երկրորդ փուլը: «Արմենպրես»-ի հաղորդմամբ, ՏԱՍՍ գործակալությունը տեղեկացնում է, որ երկրում բացվել է 2 հազար 4 ընտրական տեղամաս: Քվեարկության համար նախատեսված ևս 139 կետ կաշխատի 26 այլ երկրում:

Մոլդովայի Կենտրոնական ընտրական հանձնաժողովը գրանցել է ավելի քան 2 հազար 600 դիտորդի, որոնց թվում են ներկայացուցիչներ ԱՊՀ երկրներից, ԵԱՀԿ-ից, Ռուսաստանից, ԱՄՆ-ից և այլ երկրներից:

Նախագահական ընտրությունների առաջին փուլը կայացել էր նոյեմբերի 1-ին: Գործողություն և համերաշխություն կուսակցության առաջնորդ Մայա Սանդուն հավաքել էր ձայների 36,1 տոկոսը, իսկ երկրի գործող ղեկավար Իգոր Դոդոնը՝ 32,6 տոկոս: