ՀՀ ԱԱԾ տնօրենը բարձր է գնահատում Ռուսաստանի հատուկ ծառայությունների հետ հարաբերությունները
ԵՐԵՎԱՆ, 21 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության ազգային անվտանգության ծառայության տնօրեն Արգիշտի Քյարամյանը վստահեցնում է, որ ԱԱԾ-ն շատ լավ հարաբերություններ ունի ինչպես Ռուսաստանի Դաշնության, այնպես էլ այլ պետությունների հատուկ ծառայությունների հետ: Ինչպես տեղեկացնում է «Արմենպրես»-ը, ՀՀ ԱԱԾ տնօրենն այս մասին ասել է Եռաբլուրում լրագրողների հետ զրույցում:
«Շատ բարձր ենք գնահատում այդ հարաբերությունները, հատկապես Ռուսաստանի Դաշնության հատուկ ծառայությունների հետ ունեցած մեր ավանդական շփումները, սակայն Հայաստանի Հանրապետության ազգային անվտանգության ծառայությունը միտված է առաջին հարթին պաշտպանել Հայաստանի Հանրապետության ազգային անվտանգությունը, մեր ժողովրդին, մեր պետությունը»,- ասաց Քյարամյանը: