Չոբանյանն անվտանգային համակարգի կարևոր բաղադրիչ է համարում տնտեսական զարգացումը. հայացք Այգեպարից
ԱՅԳԵՊԱՐ, 29 ՕԳՈՍՏՈՍԻ, ԱՐՄԵՆՊՐԵՍ։ Տավուշի մարզպետ Հայկ Չոբանյանն անվտանգության համակարգի ամրության թիվ մեկ գրավականն է համարում երկրում իրականացվելիք տնտեսական ներդրումները և նախաձեռնությունները։ Ինչպես տեղեկացնում է «Արմենպրես»-ը, Տավուշի մարզի Այգեպար համայնքում անցկացվող «Հարափոփոխ տարածաշրջան, հայաստանյան առաջնահերթություններ. հայացք սահմանից» խորագրով համաժողովի ժամանակ բացման իր խոսքում Հայկ Չոբանյանն ընդգծեց, որ Տավուշը հզորացնելու և անվտանգ դարձնելու համար չափազանց կարևոր է ոչ միայն զինվորականի գործը, այլ նաև մտավորականի, գյուղացու և յուրաքանչյուր քաղաքացու։
«Երբ խոսվում էր և քննարկվում էր, թե ինչ պետք է անել Տավուշը հզորացնելու, ավելի դիմակայուն դարձնելու համար, մենք հավասարաչափ, նույնիսկ ավելի մեծ էներգիայով խոսում էինք մեր տարածաշրջանի տնտեսական զարգացման մասին` ասելով, որ դա կարևորագույն բաղադրիչն է մեր անվտանգային համակարգի։
Մենք կարող ենք տներ կառուցել մեր գյուղերում ապրող մարդկանց համար, բայց այդ տանը ապրելու համար նա պետք է ունենա աշխատանք, եկամուտ, պետք է զբաղվի ձեռներեցությամբ, որպեսզի նրա սերունդն ընտրի սահմանապահ գյուղում ապրելու ճակատագիրը»,- եզրափակեց Չոբանյանը։
Համաժողովի ընթացքում կքննարկվեն «Գլոբալ տեղաշարժեր. տարածաշրջանային վերադասավորումներ» և «Ղարաբաղյան հակամարտություն, Հայաստանի տարածաշրջանային նոր դերը» խորագրերի ներքո զեկույցներ։ Հանդես կգան արաբագետներ Սարգիս Գրիգորյանն ու Հայկ Քոչարյանը, թուրքագետ Հայկ Գաբրիելյանը, ՄԱՀՀԻ-ի ասոցացված փորձագետ Ռուբեն Մեհրաբյանը, քաղաքագետներ Ստեփան Գրիգորյանը, Ստեփան Սաֆարյանը, Արցախից նախկին նախագահի խոսնակ Դավիթ Բաբայանը։