«Հիրքան» Իրանի ազգային երաժշտության համույթը նվաճեց «Արտ մյուզիք» արվեստի փառատոնի առաջին մրցանակը
ԵՐԵՎԱՆ, 4 ՕԳՈՍՏՈՍԻ, ԱՐՄԵՆՊՐԵՍ: «Հիրքան» Իրանի ազգային երաժշտության համույթը, որը կազմված է Հայաստանի տարբեր համալսարաններում սովորող իրանցի ուսանողներից, այս տարի մասնակցել է «Արտ մյուզիք» արվեստի միջազգային փառատոնին և «Ազգային նվագարանների համույթ» անվանակարգում զբաղեցրել է առաջին հորիզոնականը:
«Արմենպրես»-ի հաղորդմամբ՝ համույթի անդամներ Սեյեդե Սահար Հոսեյնիսաբերը՝ «Քանոն», Ռաբիյե Բաբոկանի Լալեն՝ «Սանթուր» անվանակարգում և Դոնյա Ֆարոխմանեշը՝ «Ուդ» անվանակարգում իբրև անհատ կատարողներ արաժանացել են երկրորդ մրցանակի:
Վերոնշյալ համույթը նախորդ տարի ևս արժանացել էր երկրորդ մրցանակի, իսկ խմբի ղեկավար և մենակատար Ալի Ախավան Սալամաթը ժուրիի կարգավիճակով հանդես էր եկել «Դասական երաժշտություն» անվանակարգում:
Համույթը ստեղծվել է 2017 թվականին ԻԻՀ-ն դեսպանատան մշակույթի խորհրդական Սեյյեդ Մոհամմադ Ռեզա Հեյդարիի աջակցությամբ:
«Արտ մյուզիք» արվեստի 11-րդ փառատոնն այս տարի անցկացվել է առցանց հարթակում: Այն մեկնարկել է հունիսին, ավարտվել՝ հուլիսին:
Փառատոնն ընդգրկում էր անվանակարգեր արվեստի տարբեր ոլորտներում: Փառատոնի նպատակն էր հայտնաբերել և ներկայացնել հանրությանը տաղանդավոր կատարողներին, ստեղծագործողներին և արվեստի տվյալ ոլորտում հնարավորինս աջակցել նրանց առաջընթացին և փորձի փոխանակմանը: