Սուր շնչառական ու աղիքային վարակիչ հիվանդությունների նվազում կա
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Հայաստանում հասարակության շրջանում հիգիենայի կանոնների խստագույն պահպանմամբ մի շարք հիվանդությունների նվազման միտում է նկատվում:
«Արմենպրես»-ի մամուլի սրահում հրավիրված ասուլիսում ՀՀ ԱՆ հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը նշեց, որ սուր շնչառական ու աղիքային վարակիչ հիվանդությունների նվազում կա:
«Սովորաբար այս սեզոնին աղիքային վարակիչ հիվանդությունների թվի բարձրացում էր լինում: Հիգիենիկ միջոցառումների իրականացումը, ախտահանիչ գործընթացները, ձեռքերի հաճախակի լվացումը, դիմակի կրումն իրենց բարենպաստ ազդեցությունն են թողել: Նույնը՝ սուր շնչառական հիվանդությունների պարագայում: Դրանք սովորաբար մինչև մայիսի կեսեր շարունակվում են: Այս տարի չենք ունեցել այդ սեզոնային բարձրացումը: Սա շատ լավ է, որովհետև համակարգն այսօր աշխատում է հիմնականում կորոնավիրուսային հիվանդության դեմ»,- ասաց Գայանե Սահակյանը:
Մասնագետը նշեց, որ եթե հիգիենայի կանոնների բարձր մակարդակով պահպանման մշակույթը հասարակության շրջանում արմատավորվի, ապա շատ լավ կլինի: Յուրաքանչյուր սեզոնին կանխարգելիչ միջոցառումների իրականացումն էական ազդեցություն կթոողնի սուր շնչառական ու աղիքային վարակիչ հիվանդությունների տարածումը կանխելու գործում: