Կորոնավիրուսի վարակով անձանց հետ հնարավոր շփում ունեցած Արցախի 4 ոստիկանները ինքնամեկուսացվել են
ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ։ Նոր տիպի կորոնավիրուսի վարակի տարածման կանխարգելիչ միջոցառումների շրջանակներում, հաստատված կորոնավիրուսի վարակով անձանց հետ հնարավոր շփում ունեցած Արցախի Հանրապետություն «Աղավնո» հսկիչ անցակետում ծառայություն իրականացնող ոստիկանության 4 ծառայողները ինքնամեկուսացվել են։ Այս մասին «Արմենպրես»-ին տեղեկացրին Արցախի տեղեկատվական շտաբից։
«Ինքնամեկուսացված ոստիկանները ջերմություն, վարակին բնորոշ ախտանիշներ կամ որևէ բողոք չունեն»,- նշված է հաղորդագրության մեջ։
Արցախի տեղեկատվական շտաբը կեղծ և չստուգված լուրերից խուսափելու համար կրկին կոչ է անում հետևել պաշտոնական լրահոսին, որը ներկայացվում է Արցախի Հանրապետությունում ձևավորված նոր տիպի կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի տեղեկատվական շտաբի միջոցով:
Արցախում կորոնավիրուսի առաջին դեպքը գրանցվել էր ապրիլի 7-ին․ դեպքերի թիվը հասել է 3-ի:
Կարեն Խաչատրյան