Թալինում տարբեր մեքենաների կողային հայելիները գողանալու մեջ կասկածվողը բերման է ենթարկվել
ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ։ Ոստիկանության Թալինի բաժնում տեղեկություններ են ստացվել, որ գողանում են Թալին քաղաքի տարբեր թաղամասերում կայանված, հիմնականում` «Մերսեդես» մակնիշի մեքենաների կողային հայելիներ։
Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապի և լրատվության վարչությունից, բաժնի քրեական հետախույզներն անցան տեղեկությունները ճշտելու միջոցառումներին, ապա ձեռնամուխ եղան գողությունների բացահայտմանը։ Թալինի քրեական հետախույզների տեսադաշտում հայտնված Երևանի 23-ամյա բնակիչը հայտնաբերվել ու կասկածանքով բերման է ենթարկվել բաժին։ Նյութերի նախապատրաստման ընթացքում փաստական տվյալներ են ձեռք բերվել, որ երիտասարդը Արագածոտնի մարզի տարբեր բնակավայրերում մեքենաների հայելիներ է գողացել։ Հետագա միջոցառումներով հայտնաբերվել են գողացված հայելիներից երկուսը, որոնք երիտասարդը չէր հասցրել վաճառել։
Ձեռնարկվում են միջոցառումներ գողոնի մյուս մասը հայտնաբերելու ուղղությամբ։ Քննությունը շարունակվում է։