Մակունցը վստահեցնում է՝ «Այո»-ի քարոզարշավը լինելու է ակտիվ
ԵՐԵՎԱՆ, 21 ՓԵՏՐՎԱՐԻ, ԱՐՄԵՆՊՐԵՍ: Իշխանության նպատակն է սահմանադրական փոփոխությունների հանրաքվեի համար իրականացնել այնպիսի քարոզարշավ, որ կարողանան քաղաքացիներին համոզել՝ ճիշտ է գնալ ընտրատեղամաս և այնտեղ դիրքորոշում հայտնել:
«Արմենպրես»-ի հաղորդմամբ՝ այս մասին ԱԺ-ում լրագրողների հետ ճեպազրույցում ասաց «Իմ քայլը» խմբակցության ղեկավար Լիլիթ Մակունցը:
«Այս պահին ոչ թե հանրային քարոզարշավ է իրականացվում, այլ հիմնականում մարզերում և համայնքներում նախապատրաստական և հանդիպումների տեսքով աշխատանքներ: Մեր քաղաքական թիմի նպատակն է իրականացնել այնպիսի քարոզարշավ, որով կկարողանանք համոզել քաղաքացիներին, որ ճիշտ է գնալ ընտրատեղամաս և այնտեղ դիրքորոշում հայտնել»,-ասաց Մակունցն ու վստահեցրեց՝ քարոզարշավը լինելու է ակտիվ:
Նա նշեց՝ հույս ունեն, որ իրենց ակտիվ քարոզարշավը կանդրադառնա նաև քաղաքացիների մասնակցության ակտիվության վրա: Քարոզարշավի անցկացման վերաբերյալ այլ մանրամասներ նա չհաղորդեց, հորդորեց սպասել «Այո»-ի շտաբի պետ Սուրեն Պապիկյանի ասուլիսին:
Հարցին, թե արդյոք վարչապետը մասնակցելո՞ւ է քարոզարշավին, Մակունցն ասաց՝ ակտիվ ներգրավված լինելու է, սակայն կրկին հորդորեց սպասել Սուրեն Պապիկյանի ասուլիսին:
Սահմանադրական փոփոխությունների հանրաքվեն կկայանա ապրիլի 5-ին: Հանրաքվեով առաջարկվում է դադարեցնել Սահմանադրական դատարանի նախագահ Հրայր Թովմասյանի և դատարանի 6 անդամների պաշտոնավարումը:
Իշխող «Քաղաքացիական պայմանագիր» կուսակցությունը ձևավորել է «Այո»-ի շտաբը. այն ղեկավարում է ՀՀ տարածքային կառավարման և ենթակառուցվածքների նախարար Սուրեն Պապիկյանը: Կենտրոնական ընտրական հանձնաժողովը փետրվարի 18-ին գրանցել է նաև «Ոչ» քարոզչության կողմը, որի լիազոր ներկայացուցիչն է «Իրավական ուղի» ՀԿ համահիմնադիր Ռուբեն Մելիքյանը: ԿԸՀ-ն քաղաքացիական նախաձեռնության կարգով ստացել է «Ոչ» քարոզչական կողմի դիմումը 61 քաղաքացու ստորագրությամբ: