Ինձ համար կարևոր էր հաղթել արագ շախմատի առաջնությունում. Հայկ Մարտիրոսյան
ԵՐԵՎԱՆ, 23 ՀՈՒՆՎԱՐԻ, ԱՐՄԵՆՊՐԵՍ: Հայաստանի արագ շախմատի չեմպիոն Հայկ Մարտիրոսյանը առաջնությունում բեկումնային պահ է համարում երրորդ տուրի պարտիան:
«Ինձ համար մոտիվացիա է հաղթել Հայաստանի արագ շախմատի առաջնությունում, քանի որ այն կրում է իմ նախկին մարզչի` Աշոտ Անաստասյանի անունը: Ինձ համար կարևոր էր հաղթել արագ շախմատի առաջնությունում: Թեպետ պարտվել էի առաջին տուրում, սակայն մնացած ամեն ինչ հաջող դասավորվեց ինձ համար»,- «Արմենպրես»-ի հաղորդմամբ` լրագրողների հետ զրույցում ասաց Հայկ Մարտիրոսյանը:
Վերջինս անդրադառնալով Հայաստանի դասական առաջնությունում գրանցած իր արդյունքին, բեկումնային համարեց երրորդ տուրը, որտեղ ինքն անհաջող ավարտեց պարտիան, որտեղ ուներ առավելությունը:
Հաջորդիվ Հայկ Մարտիրոսյանը կմասնակցի Մոսկվայում կայանալիք միջազգային մրցաշարին և պլանավորում է մրցել նաև Եվրոպայի անհատական առաջնությունում:
Հայկ Մարտիրոսյանը երկրորդ տարին անընդմեջ դարձավ արագ շախմատի Հայաստանի չեմպիոն, իսկ տղամարդկանց 80-րդ առաջնությունում երկրորդն էր: