ԵՐԵՎԱՆ, 19 ՀՈՒՆՎԱՐԻ, ԱՐՄԵՆՊՐԵՍ:  Անգլիայի ֆուտբոլի առաջնության Պրեմիեր լիգայի 23-րդ տուրի կենտրոնական խաղում «Լիվերպուլ»-ը  հյուրընկալեց «Մանչեսթեր Յունայթեդ»-ին:

«Արմենպրես»-ի հաղորդմամբ` «Լիվերպուլ»-ը հանդիպման 15-րդ րոպեին անկյունայինի խաղարկումից հետո առաջ անցավ հաշվի մեջ: Գլխի շեշտակի հարվածով «Մանչեսթեր Յունայթեդ»-ի դարպասը գրավեց Վիրջիլ Վան Դայկը: Հետագայում «Լիվերպուլ»-ը կարողացավ ևս երկու անգամ գրավել մրցակցի դարպասը, սակայն կամ կանոնների խախտման գնով, կամ խաղից դուրս իրավիճակից, և մրցավարը չհաշվեց դրանք:

Երկրորդ կեսում հիմնականում և սուր գրոհներ էր կազմակերպում «Լիվերպուլ»-ը: Վերջիններիս գնդակին տիրելու առավելությունը 58/42-ի էր: Ի վերջո, հանդիպման վերջնամասում Մուհամեդ Սալահը խփեց երկրորդ գնդակը՝ «Լիվերպուլ»-«Մանչեսթեր Յունայթեդ» 2:0:

Այս հաղթանակից հետո «Լիվերպուլ»-ը շարունակում է մեծացնել միավորների տարբերությունը երկրորդ տեղում ընթացող «Մանչեսթեր Սիթի»-ի նկատմամբ: Յուրգեն Կլոպի գլխավորած թիմն այժմ ունի 64 միավոր: