Ամփոփվեց «Տարվա լավագույն ֆինանսաբանկային հրապարակում» թեմայով լրագրողական մրցույթը
ԵՐԵՎԱՆ, 17 ՀՈՒՆՎԱՐԻ, ԱՐՄԵՆՊՐԵՍ: Հայաստանի բանկերի միությունում կայացած միջոցառման շրջանակում ամփոփվեցին Միության նախաձեռնությամբ անցկացված «Տարվա լավագույն ֆինանսաբանկային հրապարակում» թեմայով մրցույթի արդյունքները: «Արմենպրես»-ին այս մասին հայտնեցին Հայաստանի բանկերի միությունից:
Ոլորտի մասնագետներից և փորձագետներից կազմված ժյուրին գնահատել է լրագրողների կողմից մրցույթի շրջանակում 2019թ. ներկայացված ֆինանսաբանկային թեմաներով հեռարձակված տեսանյութերը, ռադիո հաղորդումները, տպագիր ու առցանց մամուլի հրապարակումները: Բացի այդ, մրցույթում ընդգրկվել էին նաև գնահատող հանձնախմբի մշտադիտարկմամբ ընտրված այլ աշխատանքներ: Հաղթող ճանաչված աշխատանքները ժյուրիի կողմից գնահատվել են՝ կարևորելով մրցույթի թեմաներին համապատասխանությունը, անկողմնակալ և համակողմանի մասնագիտական վերլուծությունը:
Կարևորելով հանրության շրջանում ֆինանսական գրագիտության բարձրացմանը միտված նախաձեռնությունների անհրաժեշտությունը՝ Հայաստանի բանկերի միության նախագահ Մհեր Աբրահամյանն առանձնակի կարևորեց լրագրողական համայնքի դերն այս հարցում:
«Այս ձևաչափով մրցույթ ՀԲՄ-ն կազմակերպում է առաջին անգամ, սակայն այն շարունակական կլինի։ Անչափ կարևոր է ունենալ ֆինանսապես գրագետ հասարակություն, և այդ գործում մենք ակնկալում ենք նաև լրատվամիջոցների ակտիվ մասնկացությունը։ Ձեր դերն իսկապես կարևոր է նաև Ֆինանսաբանկային համակագի զարգացման, ինչպես նաև ոլորտի խնդիրների վերհանման տեսանկյունից։ Ուստի հուսով ենք, որ մասնագիտորեն հիմնավորված և անկողմնակալ հրապարակումներն ու վերլուծությունները մեր մամուլում ավելի մեծ թիվ կկազմեն։ Այդ առումով ուզում եմ ևս մեկ անգամ հայտնել ՀԲՄ պատրաստակամությունը լրագրողական համայնքի և մասնավորապես տնտեսական լրագրողների հետ բաց և արդյունավետ համագործակցության առնչությամբ»,- նշեց ՀԲՄ նախագահ Մհեր Աբրահամյանը:
Մրցանակների հանձնման հանդիսավոր արարողության ժամանակ Հայաստանի բանկերի միության գործադիր տնօրեն Սեյրան Սարգսյանը նշեց, որ մրցույթի նպատակը ֆինանսաբանկային համակարգի զարգացման միտումներն ու խնդիրները վերհանելու, դրանք հանրությանը մատչելի և մասնագիտորեն մեկնաբանված ներկայացնելուն է միտված:
«Հաշվի առնելով այն հանգամանքը, որ մեր աշխատունակ բնակչության 80 տոկոսից ավելին առևտրային բանկերում ունեն հաշիվներ, կարելի է ենթադրել, որ համակարգին վերաբերող զարգացումները պետք է հետաքրքրեն հանրության լայն շրջանակներին: Մրցութային նյութերը դիտարկելիս առիթ եղավ առնչվելու այնպիսի հրապարակումների, որոնք, թերևս, համապատասխանում էին մրցութային պայմաններին, սակայն, օրինակ, բանկային ոլորտի մասնագետների տեսանկյունից փոքր-ինչ բանավիճային էին: Այս փաստը թույլ է տալիս ենթադրել, որ այսուհետ մեր համագործակցությունը լրագրողական համայնքի հետք պետք է առավել սերտ և արդյունավետ լինի»,-ընդգծեց ՀԲՄ գործադիր տնօրեն Սեյրան Սարգսյանը;
Այնուհետ կայացավ մրցույթի 4 անվանակարգերում հաղթողների մրցանակաբաշխությունը։ Ըստ այդմ, «Լավագույն վերլուծություն» անվանակարգում հաղթող ճանաչվեց «ԱՐՄԻՆՖՈ» լրատվական գործակալության լրագրող Կարինա Մելիքյանը: «Լավագույն տեսանյութ» անվանակարգում մրցանակը հանձնվեց banksnews.am կայքի լրագրող Էդուարդ Մանուկյանին:
«Լավագույն ռադիոհաղորդում» անվանակարգում հաղթող ճանաչվեց Հանրային Ռադիոյի լրագրող Հասմիկ Դիլանյանի հաղորդումը: Իսկ «Ինքնատիպ վերլուծություն» անվանակարգում մրցանակը հանձնվեց 168.am կայքի լրագրող Վասակ Թարփոշյանին:
Մրցութային անվանակարգերում հաղթող ճանաչված բոլոր լրագրողներին հանձնվեցին հավաստագրեր և դրամական մրցանակներ:
Մրցույթը կայացել է ՀԲՄ նախաձեռնությամբ իրականացվող «Ֆինանսական գրագիտություն և հմտություններ» խորագրով հանրային միջոցառումների ծրագրի շրջանակում: