Նախիջևանի ուղղությամբ ՀՀ զինված ուժերն ունեցել են ռազմական տեխնիկայի նմուշների ավելացում. ԳՇ պետ
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության զինված ուժերը վերջին ամիսների ընթացքում մեծ աշխատանք են իրականացրել հենակետերի ամրապնդման, ճանապարհային ցանցերի լայնացման ու զարգացման ուղղությամբ, ինչը թույլ է տալիս կրճատել ժամանակը զորքերի տեղաշարժի համար: Ինչպես հաղորդում է «Արմենպրես»-ը, այս մասին 2019 թվականի ամփոփիչ մամուլի ասուլիսի ժամանակ հայտարարեց ՀՀ ԶՈՒ գլխավոր շտաբի պետ, գեներալ-լեյտենանտ Արտակ Դավթյանը:
«Առանձին տեղերում տեղաշարժերի արդյունքում ունեցանք հենակետերի օպտիմալացում, որի շնորհիվ որոշակի հենակետերի զինծառայողներ ծառայությունը կազմակերպում են մեկ կետից՝ ավելի մեծ ուժերով»,- ասաց Դավթյանը:
Նա տեղեկացրեց, որ Նախիջևանի ուղղությամբ ՀՀ զինված ուժերն անցնող տարում ունեցան սպառազինության, ռազմական տեխնիկայի որոշակի նմուշների ավելացում: «Սա մեզ թույլ է տալիս ասել, որ այս ուղղությամբ մարտական հենակետերի համակարգում մենք վատացում չենք ունեցել, ունեցել ենք որոշակի բարելավում, որը մարտավարական բնույթ է կրել»,- նշեց գլխավոր շտաբի պետը:
Նա հավելեց, որ թեպետ Ադրբեջանը մեծ ջանքեր է գործադրում Թուրքիայի հետ, որպեսզի ուժեղացնի Նախիջևանի համազորային բանակը, հայկական կողմը համապատասխան միջոցառումներ է ձեռնարկում՝ թույլ չտալու հակառակորդին Նախիջևանի կողմից ունենալու սպառազինության գերակայություն: