Արաքս գետի ափի շուրջ շինաշխատանքները կիրականացվեն գալիք տարի. ռուսական կողմը որևէ կապ չունի. Արսեն Հարությունյան
ԵՐԵՎԱՆ, 14 ԴԵԿՏԵՄԲԵՐԻ, ԱՐՄԵՆՊՐԵՍ: Կառավարությունը հաստատեց էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի կարիքների համար գնման պայմանագրի դադարեցնելու մասին որոշման նախագիծը: Կնքված պայմանագրի շրջանակում կատարվել են ՀՀ Սյունիքի մարզում Մ-2 Երևան-Գորիս-Մեղրի-Իրանի սահման միջպետական ավտոմայրուղու 379+200 կմ երկարությամբ հատվածում Արաքս գետի ափի շուրջ 40 մ երկարությամբ հատվածի վթարային վիճակի վերացման աշխատանքների նախապատրաստական բոլոր փուլերը:
«Արմենպրես»-ի փոխանցմամբ, ըստ նախագծի, քանի որ վերոնշյալ հատվածը Արաքս գետով սահմանակից է Իրանի Իսլամական Հանրապետությանը, և մեր ափամերձ տարածքները հսկվում են ՌԴ-ի 2393 սահմանապահ զորամասի կողմից, ուստի անհրաժեշտ էր ձեռք բերել համաձայնություն կողմերի միջև՝ նշված հատվածում աշխատանքների կատարման և ավարտման համար: Սակայն աշխատանքային կարգով հանդիպումների ընթացքում հնարավոր չի եղել արդյունավետ համագործակցել, և կողմերի միջև համաձայնություն ձեռք չի բերվել:
Գործադիրի նիստից հետո լրագրողների հետ զրույցում Ջրային տնտեսության պետական կոմիտեի նախագահ Արսեն Հարությունյանը նշեց, որ պայմանագրով ընդհանուր 12,2 միլիոն դրամի աշխատանք է նախատեսված, որի հիմնականը՝ 9,5 մլն դրամի աշխատանքը շինարարն ավարտել է: «Քանի որ իրանական կողմի հետ բանակցությունները դեռ շարունակվում են և այս տարի չեն ավարտվելու, ստիպված պայմանագիրը ավարտում ենք, որ շինարարը տույժ-տուգանքների տակ չընկնի: Բանակցություններն իրանական կողմի հետ շարունակվում են, ռուս սահմանապահները որևէ կապ չունեն այս ամենի հետ»,- վստահեցրեց Հարությունյանը՝ ավելացնելով, որ ռուսական կողմը պարզապես ներկա է լինում իրանական կողմի հետ բանակցություններին՝ որպես սահմանը վերահսկող կողմ:
Դիտարկմանը, թե նախագծի հիմնավորման մեջ գրված է, որ խնդիրը ռուսական սահմանապահների հետ է, և նրանք համաձայնություն չեն տալիս, Արսեն Հարւթյունյանը նշեց, որ վրիպակ է եղել:
«Ռուսական սահմանապահների հետ մենք բանակցում են իրանական կողմի հետ, եթե իրանական կողմը համաձայնություն չի տալիս, նշանակում է, որ թելը կտրվում է: Մենք ռուսական կողմի հետ որևէ խնդիր չունենք»,- ասաց նա՝ ավելացնելով, որ ափապաշտպան աշխատանքների արդյունքում գետի հունը փոխվում է, և իրանական կողմն առարկություններ ունի, քանի որ գետը թեքվում է Հայաստանի կողմը: «Ռուսական կողմը ձայնի իրավունք չունի և որոշում ընդունողը հայկական ու իրանական կողմերն են»,- ասաց նա:
«Իրանական կողմը հարց է բարձրացել և հիմա քննարկումներ են ընթանում, խոսքը 40 մետրի մասին է: Իրանական կողմի բանակցությունները դադարեցնում ենք, քանի որ շինարարը տույժ-տուգանքի տակ է ընկնում, մենք պարտավոր ենք նրա կենսագրությունը մաքուր պահել, քանի որ շինարարի պատճառով չէ, որ աշխատանքները դադարեցվում են: Աշխատանքները ժամանակավոր են դադարեցվում են և կմեկնարկեն գալիք տարի՝ իրանական կողմի հետ նույն ժամանակահատվածում», - ընդգծեց Ջրային տնտեսության պետական կոմիտեի նախագահը: