ԵՐԵՎԱՆ, 26 ՄԱՐՏԻ, ԱՐՄԵՆՊՐԵՍ: Հայկական Be Armenian նախագիծն առաջարկում է Սուրբ Հարության տոնին միմյանց ուղարկել հայերեն բացիկներ նորաստեղծ հավելվածի միջոցով: «Արմենպրես»-ի փոխանցմամբ՝ նախագծի թիմն անվճար ստեղնաշար է ստեղծել, որը տրամադրում է ծրագրի հետ՝ այդպիսով կանխելով նաև հնարավոր լեզվական խոչընդոտների առկայությունը: 

Նախագծի ղեկավար Հրանտ Դարբինյանի խոսքով՝ տարիներ շարունակ հայալեզու բացիկներ չեն եղել, իսկ ընդհանրապես հայերեն էլեկտրոնային բացիկներ այժմ էլ չկան, և այս առումով Be Armenian նախագիծը միմյանց շնորհավորելու և զգացմունքները հայերեն արտահայտելու լավ հնարավորություն է ընձեռում ոչ միայն Հայաստանում բնակվող հայերին, այլ նաև Սփյուռքի մեր հայրենակիցներին: Ծրագիրն այժմ հասանելի է iOS օպերացիոն համակարգով աշխատող սարքերի համար, այն կարելի է ներբեռնել այստեղ: Առաջիկայում պատրաստ կլինի նաև ծրագրի՝ Android օպերացիոն համակարգով աշխատող սարքերի համար նախատեսված տարբերակը: Be Armenian-ը շուտով հնարավորություն կտա էլեկտրոնային բացիկները ուղարկել նաև Facebook հարթակում: