Գաբրիել Ղազարյանն ընդունել է ՀՀ-ում Իրանի դեսպանին
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ սպորտի և երիտասարդության հարցերի նախարար Գաբրիել Ղազարյանն ընդունել է Հայստանի Հանրապետությունում Իրանի Իսլամական Հանրապետության արտակարգ և լիազոր դեսպան Մոհամմադ Ռեյիսիին՝ մեր երկրում դիվանագիտական առաքելությունն ավարտելու կապակցությամբ:
«Արմենպրես»-ի հաղորդմամբ` նախարարը ողջունել է դեսպանին և իր գոհունակությունը հայտնել Հայաստանում նրա պաշտոնավարման ընթացքում սպորտի և երիտասարդության ոլորտներում կատարած աշխատանքի համար: «Մեր երկու երկրների միջև, արդեն ձևավորված ավանդույթի համաձայն, հաջողությամբ իրագործվում են բազմաթիվ ծրագրեր՝ այդ թվում նաև սպորտի և երիտասարդության ոլորտներում»,- ասել է Ղազարյանը և ավելացրել, որ այդ գործընթացում մեծ է նաև պարոն Մոհամմադ Ռեյիսիի մասնագիտական հմտությունը և ակտիվ մասնակցությունը: ԻԻՀ դեսպանը շնորհակալություն է հայտնել ջերմ ընդունելության համար և ասել, որ մեր երկրից հեռանում է անմոռանալի և տպավորիչ հիշողություններով: Հանդիպման ավարտին նախարար Ղազարյանը հուշանվեր է հանձնել ԻԻՀ արտակարգ և լիազոր դեսպանին: