ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ:  Ֆուտբոլի միջազգային ֆեդերացիայի (ՖԻՖԱ) ու Եվրոպական ֆեդերացիայի (ՈՒԵՖԱ) կանոնադրությունները թույլ են տալիս համատեղել ՈՒԵՖԱ-ի նախագահի պաշտոնը ՖԻՖԱ-ի նախագահի պաշտոնի հետ:

«Կանոնադրությունը թույլ է տալիս, որ կառույցների ղեկավարությունը համատեղվի»,- «Արմենպրես»-ի հաղորդմամբ, ՈՒԵՖԱ-ի մամուլի ծառայությունը հայտնել է՝ ի պատասխան ՏԱՍՍ-ի հարցմանը: ՈՒԵՖԱ-ի նախագահը պաշտոնապես հայտարարել է ՖԻՖԱ-ի նախագահի ընտրությունների իր մասնակցության մասին:

Յոզեֆ Բլատերը 2015թ. մայիսի 29-ին կայացած ընտրությունների արդյունքներով վերընտրվել էր ՖԻՖԱ-ի նախագահի պաշտոնում: Սակայն 4 օր անց ՖԻՖԱ-ում կոռուպցիոն սկանդալի մասին խոսակցությունների համապատկերում նա հայտարարեց հրաժարականի մասին: ՖԻՖԱ-ն արդեն հաստատել է, որ նոր նախագահի ընտրությունը տեղի կունենա 2016թ. փետրվարի 26-ին: