Սիրիայի նախագահն ու Իրաքի վարչապետի բանագնացը քննարկել են ահաբեկչության դեմ պայքարի հարցը
ԵՐԵՎԱՆ, 29 ՀՈՒԼԻՍԻ, ԱՐՄԵՆՊՐԵՍ: Սիրիայի նախագահ Բաշար ալ Ասադն Իրաքի վարչապետ Հեյդար ալ Աբադիի բանագնաց, ազգային անվտանգության հարցերով խորհրդական Ֆալիհ ալ Ֆիյադի հետ քննարկել է երկու երկրների, մասնավորապես, ահաբեկչության դեմ պայքարի վերաբերյալ հարցեր: Ինչպես հաղորդում է «Արմենպրես»-ը` վկայակոչելով սիրիական «ՍԱՆԱ» գործակալությունը, նրանք հաստատել են, որ անհրաժեշտ է շարունակել պայքարն ահաբեկչական կազմակերպությունների դեմ, մինչև երկու երկրները մաքրվեն ահաբեկիչներից:
Զրույցն ընթացել է ստեղծված վտանգավոր իրավիճակի շուրջ, որով անցնում է տարածաշրջանն ահաբեկչության դեմ պատերազմում: Երկու կողմերը նշել են, որ ահաբեկչությունը, ուղղված բոլոր ազգերի ու ժողովուրդների դեմ, չունի ոչ կրոն, ոչ հայրենիք:
Նրանք հաստատել են, որ ահաբեկիչների վերջնական ոչնչացումը պահանջում է միասնական ջանքեր տարածաշրջանային ու միջազգային մակարդակներում, որի հիմքը պետք է լինի կառուցողական համագործակցությունը, պետությունների ինքնաիշխանության և ժողովուրդների շահերի հարգումը: