Ադրբեջանում կովերով բողոքի ակցիա է անցկացվել
ԵՐԵՎԱՆ, 4 ՀՈՒԼԻՍԻ, ԱՐՄԵՆՊՐԵՍ: Ադրբեջանում կովերով բողոքի ակցիա է տեղի ունեցել:
Ինչպես հաղորդում է «Արմենպրես»-ը` վկայակոչելով «Ազատություն» ռադիոկայանի ադրբեջանական ծառայությունը, Իմիշլիի շրջանի Արանլը գյուղի բնակիչները հուլիսի 4-ի առավոտյան, որպես բողոք, իրենց տավարը քշել են ոչ թե արոտավայրեր, այլ գյուղապետարանի շենքի դիմացի հրապարակ:
Գյուղացիները բողոքում են գյուղապետարանի կողմից հասարակական արոտավայրերը մասնավոր անձանց վաճառելու դեմ, որտեղ նրանք տարիներով արածացրել են իրենց անասուններին:
Գյուղացիները պնդում են, որ իրենց համար արոտատեղիների կորուստը սպառնում է տավարի կորստով, ինչն իրենց համար նշանակում է՝ կորցնել վաստակի միակ աղբյուրը:
Գյուղ են ժամանել շրջանի ոստիկանության եւ գործադիր իշխանության ներկայացուցիչներ: Կովերով բողոքի ցույցը շարունակվում է: