Շալանդը մեկնաբանել է Հայաստանի ազգային թիմից հեռանալը
ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Ֆուտբոլի Հայաստանի հավաքականի արդեն նախկին գլխավոր մարզիչ Բեռնար Շալանդը շվեյցարական մամուլին տված մեկնաբանությամբ անդրադարձել է Հայաստանի ազգային թիմից հեռանալուն:
«Հայաստանի հավաքականի ֆուտբոլիստները ցանկանում էին, որ մնայի հավաքականում: Որպես այդպիսին` ես հրաժարական չեմ տվել, նստել և խոսել ենք, որից հետո հեռացել եմ: Եթե խաղերը ձգվեին 75 րոպե, ապա մենք 10 միավորով առաջին տեղում կլինեինք, սակայն չխոսել հանդիպումների արդյունքների վրա ազդող հանգամանքներից չեմ կարող: Եվրոպայի առաջնության եզրափակիչ դուրս գալու ծրագիրը խելահեղ էր, սակայն ինձ դուր են գալիս այդ տեսակ բաներ»,- «Արմենպրես»-ի հաղորդմամբ, Շալանդի խոսքերը մեջ է բերում Le Matin պարբերականը:
Նախօրեին Հայաստանի ազգային հավաքականի գլխավոր մարզիչ Բեռնար Շալանդը Հայաստանի ֆուտբոլի ֆեդերացիայում հրաժարականի դիմում է ներկայացրել ֆեդերացիայի նախագահ Ռուբեն Հայրապետյանին, որն ընդունվել է ՀՖՖ նախագահի կողմից: